每次車展都肯定有一堆靚車，噚日洛杉磯車展Mercedes-Maybach正式公布Maybach S650 cabriolet。佢哋出開豪華靚車本應無乜特別，不過呢款只限量製造300部，其中75部已確定留畀美國市場，而每部車都有獨立編號刻喺中控台底下，正所謂物以罕為貴，據稱外國定價差唔多US$30萬 (約HK$232萬)。
架車大量採用電鍍飾件，以彰顯奢華氣派，包括頭唇、A柱、側裙及雙邊4出尾喉，全電鍍鬼面罩亦確實少見，而20吋鋁合金密爪軨既古典又高貴，就連頭燈內都鑲嵌咗Swarovski水晶作裝飾，襯埋內櫳白色真皮物料充滿時尚感。
雖然架車唔係走高性能路線，但如同其他同級車款一樣，採用6.0L V12雙渦輪增壓引擎，馬力高達621匹，0-100km/h約需4秒。
(圖片來源:Mercedes-Maybach)
高貴奢華 Maybach S650 cabriolet限量300部
