約女仔出街食飯，有人會認為男方埋單付全數係基本動作，但亦有人會覺得喺現今男女平等嘅社會裡，AA制會公平一啲，唔應該係由男士獨力承擔。咁究竟對於處於唔同崗位嘅女士嚟講，係唔係男仔比晒餐飯嘅錢，先稱得上係好男人呢？最近就有調查邀請左10位職業女性現身說法，解釋自己支持以及反對男性埋單嘅理據。
1. AV女優：「最好就比晒囉！」
AV女優某程度可以稱得上係男士夢幻女神，同埋佢地經常都需要討好兩性特別需求，咁應該就對男女間親密關係比較熟悉。對於男方係唔係應該全付餐飯嘅錢，AV女優「甜心曲奇」（Harriett Sugarcookie）就認為男方最好就比晒，但做法則應該係女方都會提議AA制，而男方就堅決要找全數。當然如果男方覺得食完呢餐飯就唔會有下文，咁就可以直接考慮AA制。
2. 性愛TIPS博客：「應該睇下女士意願。」
雖然好多有關愛情TIPS嘅文章都會主張女性要求男方埋單，但外國性愛TIPS博客Girl on the Net則認為，男士應該按照女性意願付帳，女士亦都唔應該強人所難。例如喺約會時候，女方如果唔介意AA制當然可以提出，但如果對方真係堅持到無彎轉，咁女方就可以接受男方請客。Girl on the Net更覺得如果女方堅持，覺得男方無論如何都應該找數的話，佢地心底裡面其實都唔係咁鐘意對方，並且覺得雙方關係並不對等，對方正在浪費自己時間。
3. 愛情顧問：「雖然好老土，但有必要保留呢種交際禮儀。」
雖然男性埋單聽落好似好老土，唔似應該喺主張平等嘅現代社會會做嘅事，但愛情顧問諾貝爾（Kezia Noble）就認為呢種禮儀最基本都應該喺第一次約會照做，為女方留下好印象。就算女方堅持AA制分帳，諾貝爾都認為男方都應該口頭上答應，然後暗地裡自己比晒全數，咁就能夠為男士加分。
4. 性感超模：「要討好女性，當然最好就比晒。」
性感超模美神（Danielle Mason）覺得如果約會男方唔比晒全數，反而要求AA制，佢就會覺得好意外，仲會認為對方有啲無禮貌。美神仲提醒除左埋單應該係男方指定動作之外，男士喺餐桌上都亦要有基本禮儀，例如唔應該成日講關於佢自己嘅野，以及要記得所有事都要係「ladies first 」。更甚嘅係美神認為，第一次約會嘅場所絕對唔能夠係佢屋企，而應該係出去見的大體，能夠「wined and dined」嘅餐廳。
5. 女權主義者：「男士埋唔埋單並唔重要。」
現今社會主張男女平等，因此女權主義者庫姆（Holly Combe）就認為去到呢個年頭，根本就唔應該有其中一個性別被定型為必定要全付約會帳單，兩性都應該獲得公平對待。對於坊間好多戀愛小TIPS都鼓勵男性全付帳單，或者教導女性喺一段關係裡面應該點做，庫姆更表示非常反感，並認為男女都應該按照實際情況同自己意願去做。
6. 狗仔隊記者：「兩性應該平等。」
對於社會經常都會比壓力其中一方，認為男性應該主動埋單，以及女性應該要為付全數嘅男士加分，狗仔隊記者捷德（Kelly Jade）就覺得咁做對於兩性都係唔公平。捷德補充兩性本身嘅待遇就應該係平等，因此覺得大家應該按對象同自己喜好行事，而並非受到社會壓力而去埋單。
7. 喜劇演員：「男人賺多啲，找數係應該。」
喜劇演員史提芬遜認為按照英國當地狀況，由於男士薪金係高過女士19.7%，因此男仔約女仔出街食飯找數應該係理所當然的。史提芬遜更加舉例指出，如果男士係邀請女士去高級餐廳食飯，咁喺無考慮過女方經濟條件之下，男方就自然要為女方比埋佢個份。史提芬遜更坦言，雖然自己有時都會向男方提出AA制付款，但心裡面都總會覺得應該係由男性負擔全數。
8. 記者：「既然係你約人出街，餐飯自然就係你找數，但女仔都唔應該兩手空空咁受晒人好意。」
雖然會覺得因為係對方約自己出街就應該找數，但BBC記者愛瑪·巴內特（Emma Barnett）卻同時覺得作為女仔都唔應該照單全收，應該準備一啲小心意回禮，例如可以送番枝酒比對方以示感謝。
9. 社會學講師：「金錢買唔到一個女人。」
為女性埋單源自中古騎士習俗，象徵著男性經濟能力及社會地位比女士高尚。因此建基於咁嘅意義之下，社會學講師Julia Long就認為無論男女都唔應該繼續接受如此習慣，應該平等對待對方。此外，Julia Long亦都覺得雙方要警醒女性並唔係金錢能夠收買，亦都唔係一件能夠以金錢能夠衡量嘅貨物。
10. 舉重力后：「最終都係要尊重男士意願。」
舉重力后戴維斯（Sarah Davies）認為女性其實喺好多方面都能夠同男士睇齊，而自己亦都係一個活生生嘅好例子。所以雖然戴維斯自己本身會偏好男仔埋單，覺得咁樣係好man，同埋似係男仔能夠保護女仔嘅表現，但戴維斯其實就覺得男仔無必要每次都找晒數，而且最終其實都係要尊重番男士以及女士個人意願。
