性伴侶數目雖然係一個較為私人嘅問題，但有時候同兄弟傾開計，難免都會講到類似嘅Topic，令你都要隨口申報一下。但其實大家又有冇諗過，對方或者自己當中加入左幾多水分嘅呢？

最近，英國嘅藥妝公司Superdrug就訪問左歐美逾2,180名男女，睇下佢地對於性伴侶數目呢個題目嘅坦誠度，以及相關睇法。唔知究竟男同女邊個較常報大／細數，同埋背後係有乜野原因驅使佢地咁做嘅呢？

▼ 男同女邊個較常報大／細數？

根據研究喺兩性之間，部分男士報大數嘅情況比女士多一倍有多，而部分女性則較為傾向報細數。此外，亦都有人會睇情況而老作自己性伴數目，有時作大又有時作細。但總括嚟講，無論男女都有過半數人從來唔會講大話，坦白講自己有幾多位性伴侶。

▼ 對於另一半嘅性伴數目有乜感覺？

究竟擁有幾多位性伴先至會令人反感呢？原來男女嘅底線其實都相差無幾，女士就認為平均男士有15.2位性伴就等同於太多，而男士則認為14位。而喺一生人裡面，男性就較為接受另一半擁有7.6位性伴侶，亦都係同女士7.5位嘅睇法差唔多。而假如另一半只係有1.9位性伴，女性就會覺得對方較為保守，相反男士則認為2.3位就等於較為保守。

此外，接受調查嘅女士坦言自己目前曾經平均同7位人士發生過性行為，而男士嘅平均性伴數目為6.4。

▼ 關係發展成點先會同另一半透露自己性伴數目？

無論男女，大部分人都認為一段關係發展左1至4個月就較為適合同對方透露自己性伴數目。同一時間，亦都有差唔多數目嘅人認為頭一個月就可以講比另一半聽。更令人意外嘅係，原來都有11.3%以及10.9%嘅男性及女性選擇永遠唔透露自己性伴數目比另一半知道。

▼ 另一半太多性伴會影響關係嗎？

知道左另一半過往有好多性伴侶之後，有33%嘅人都認為二人關係唔會因此改變，保持中立。而覺得有機會改變以及無乜機會會有改變嘅，則分別為21%及20%，數目相當接近。最後覺得性伴數目極有機會改變二人關係嘅，都有9%。

▼ 另一半太少性伴會影響關係嗎？

太多可能會關係有所改變，咁太少又會唔會有相同反應呢？原來就算對方過往無乜性伴侶，過半數嘅人都認為好少機會會因此令關係改變，意味另一半太少性伴侶係唔係太影響一段關係嘅發展。

▼ 性伴數目及確診性傳播疾病關係

擁有15位或以上性伴侶，獲確診性傳播疾病嘅數字就較高，有13%。而10到14位以及5至9位，獲確診性傳播疾病就同樣有8%。至於0到4位嘅則只有3%。

資料來源：Superdrug
封面圖片：weheartit