香港人忙碌而且擺放裝備嘅地方有限，想要做運動真係最容易就係跑步。只要購入合適嘅衣物及跑鞋，大家就可以隨時隨地躍進街道狂奔。但如果一個唔好彩，今個星期天氣超唔穩定，又或者氣溫太熱令人為之卻步，咁或者你就可以轉戰以下5條室內緩跑徑，等自己唔可以偷懶浪費任何一日運動嘅寶貴時間！
1. 上水保榮路體育館
位於新界上水百和路，保榮路體育館有著一條2線道嘅室內緩跑徑供大家使用，全長更加係162米，屬於5條室內緩跑徑中最長。假如你係住喺北區而且又習慣跑步嘅話，可以搵日去試下呀！
2. 調景嶺體育館
將軍澳貴為新市鎮，體育館設施當然都會比大家更為完善啦！開左只有一年左右，調景嶺體育館入面嘅全場約150米緩跑徑嘅係全港最靚。更甚嘅係除左不斷兜圈之外，調景嶺體育館嘅緩跑徑更會有少少波浪形設計，跑落都會無咁悶啦！但當然挑戰性都會高少少架！
3. 香港公園體育館
除左較新嘅體育館會有室內緩跑徑之外，其實位處於中環，而且歷史非常悠久嘅香港公園體育館都係有室內緩跑徑比大家免費使用。如果你係喺中環、金鐘、灣仔嗰邊番工，真係可以考慮下收工或者番工前去跑下呢條全長150米嘅緩跑徑，連健身中心會席年費都慳番呀！
4. 坑口體育館
坑口體育館同調景嶺體育館一樣，都係較為新建嘅體育館。但相比調景嶺體育館，佢全場150米嘅緩跑徑就只係單線跑道。所以如果多人少少，或者就有機會比人逼住逼住跑唔開。
5. 天水圍天暉路體育館
最後一個較新落成而且又有緩跑徑嘅體育館，就係喺12年建成嘅天水圍天暉路體育館。雖然天暉路體育館嘅緩跑徑就只有130米，係咁多個之中最短，但佢卻優勝在通道比其他夠晒闊落，有成3條跑道咁多！
（圖片來源：香港政府香港品牌網頁）
