【食譜】新清淡食法：檸檬蒸烏頭

依家都真係幾鐘意行街市，因為行行下又可以學下煮乜新餸。

今次我就行過魚檔，聽到店主姨姨教路學煮左依個幾清新嘅檸檬蒸烏頭！

因為烏頭係生長咸淡水交界，所以佢都會帶有少少泥味，所以如果用嚟清蒸，唔多唔少會有點點泥味。所以可以同檸檬一齊煮，咁就可以辟去泥味之餘，又可以帶出魚出嘅鮮味，最好就係烏頭都唔係啲貴價食材，所以就試下啦！

材料：

烏頭魚一條、檸檬一個、蒜茸一湯匙、魚露兩至三湯匙、糖一茶匙及胡椒粉適量

做法：

1. 買烏頭買可以請店員幫忙開邊，將魚冼淨之後就放少許胡椒粉上魚身

2. 然後將半個檸檬切片和蒜茸鋪上魚身，想惹味少少就可以加上指天椒，不過因為小小豬一齊食，所以我今次冇加

3. 鑊內加入水，待水滾後蒸十分鐘(視乎魚嘅大小，加減蒸魚分鐘)

4. 就係依個時候就可以準備個汁，將半個檸檬揸汁，連同糖加入魚露內

5. 放入碗中坐熱水，其實主要是溶解糖係汁中。如果屋企有微波爐，可以放入去叮15秒，咁就方便少少

6. 蒸好之後就可以蒽粒灒油，然後加入汁

就食得啦～

用左檸檬嚟蒸烏頭魚，個味都幾特別，酸酸都又真係帶出嗰一種鮮甜味，入口仲好似幾清新，就連老公都讚有特色，叫我過兩日再煮多次添！