聽講因為勞心勞力都無獲得外界嘅認同，自覺非常心痛，政界近年嚟都引發左唔少嘅政情中人流下左男兒淚。雖然好耐之前鼎爺嘅一泡眼淚就已經吸引左唔少網友討論，但講到爆紅喇喎，就點都唔及尋日疑似哽咽，兼迎難而上嘅梁特首啦！
但點解一男子嘅眼淚一出，就會成為全城焦點嘅呢？咁就絕對係同呢個最近蒂爾堡大學做嘅研究有關！因為原來男人喊嘅機會，真係少過女人架！唔怪得大家見到都真係咁出奇啦！
荷蘭蒂爾堡大學喺無耐之前，就曾經邀請過37個國家逾5,000位嘅民眾，接受一項關於哭泣嘅調查。結果發現女性喺一年裡面，哭泣嘅次數一年大約就有30至到64次，而男人就只係得17次左右，數量真係相差甚遠。此外相比起女士，男性喊喊下收掣嘅成功率亦都比女人高，每次喊嘅平均時間就只係兩至三分鐘，亦都比女士平均六分鐘嘅時間短。
至於喊嘅程度方面，男人就比較少機會嘅到呼天搶地，但女士卻好容易就會係冷靜落嚟之後，隔16至30分鐘再喊多次，比男士出現同樣情況嘅機會高出一倍。
▼男人比女人較少機會嘅到呼天搶地。
但究竟係乜野嘅原因會令女人喊得多過男人呢？
根據有份研究呢個項目嘅Vingerhoets教授講法，其實科學界一直都有唔同嘅理論去分析男人比女人喊得較少嘅原因，例如女性淚溝比男性淺就係其中一個有機會引致呢個狀況嘅生理條件。
此外除左生理條件，人嘅富庶程度亦都會同引發哭泣有所關連，例如喺較為富庶嘅國家裡面，男女哭泣嘅比例都會相對較高。
資料來源：英國電訊報
圖片來源：Tumblr
