小聲點

啱啱做咗一個好唔想做嘅決定，因為公司發生咗一件小事。

詳細係咩事就唔好講喇，但其實我自己覺得只係一件小事，不過有時候喺一間極度重視制度和規矩嘅公司做嘢，就算唔係影響到生意，都可以係一件大事。可以這樣說吧，是文化問題。重點是，因為這件小事，我要做一件平時我好唔鍾意做嘅事，就係問責。作為夾喺老闆同下屬之間嘅中層，有啲鑊可以孭，有啲鑊孭唔起就要交個名出嚟。

咁當然，喺交個名出嚟之前，我已經有心裏有數嗰個係邊個。成年人了，希望他也懂得為自己做過的事負責。

雖然明知係邊個人，但我覺得都係逐個同事問一問先好啲。其餘的同事雖然表現得有點戰戰兢兢，但語氣和神態絕對正常。當去到真係有問題嗰位同事，我問佢嘅，都只係同其他同事一樣嘅問題，但係佢好明顯答得有啲情緒失控，頸上微現青筋，仲要越講越大聲。

呢個故事嘅結局唔重要，反而我想分享一件兒時小事。

細個嗰陣，阿媽好興買啲課外練習畀我做。有次真係勁唔想做，但又費時畀阿媽話我懶，於是我就抄晒後面答案紙嘅答案。阿媽放工返嚟，食完飯幫我逐題練習對一次。其實我嗰陣都有啲旁門左道嘅小聰明，即係，就算我係抄答案都抄得好巧妙，抄十題都識特登錯三題。但我呢啲小把戲喺阿媽面前當然唔入流，佢純粹望住我問一句：點解要抄答案？

嗰刻我著晒燈，即係所謂嘅老羞成怒，係咁大大聲一輪嘴話「我冇抄答案」、「點解問都冇問就唔信我」、「我講咩都冇用㗎啦」。講完之後，依然一副咬牙切齒的模樣。

喺嗰次之後，我並冇學識做一個誠實嘅人，就算嚟到今時今日，需要講大話嗰陣我仍然係會講大話。不過嗰次之後，我學識咗一個道理。

我慢慢冷靜下來，媽媽看著我，那雙慈祥寧和的眸子盛著百般無奈。好半天後，她伸手摸著我的頭說：仔......

問心無愧嘅話，講嘢唔使咁大聲。