周末流流長，平時焗甜點玩到有啲悶？咁或者你就可以趁就嚟中秋，開始動手試下整下呢啲睇得又食得嘅小糰子，等自己過番個日式嘅中秋節，同自己鐘意嘅卡通人物過今年嘅中秋！更甚嘅係如果您有打算約埋三五知己一齊賞月嘅話，您更加可以整嚟招待佢地添呀！咁得意大家一定鐘意啦！仲唔郁手今個星期試下！？
▼比卡超呢期咁紅，用嚟做糰子真係呃like一流架！
▼假若覺得比卡超睇落好複雜無乜信心，白雪雪圓碌碌嘅Baymax就最適合初哥試作。
▼小海豹都係適合初哥製作嘅造型之一，雖然簡單但睇落都超級可愛。
▼如果您平時整甜品已經有一手，咁或者就可以嘗試挑戰難度，例如參考遊戲tsum tsum嘅角色整糰子。
▼真係會可愛到你唔想食左佢地落肚架！
咁究竟呢啲咁得意嘅糰子，本身難唔難整嘅呢？其實基本上如果你細個玩過搓泥膠嘅話，應該就無乜難度嘅！
▼ 等我地一齊黎睇下呢位Youtuber嘅超簡易教學啦：
【材料】
糯米粉
粥／水
色素
豆沙
可可粉
【做法】
1) 將豆沙倒喺保鮮紙表面，搓成條狀，並用刀平均輕輕切開成小份，再搓成球狀。
2) 將糯米粉倒入盤子裡面，慢慢加入熱水／粥搓成麵糰。到麵團唔黏手之後，就用保鮮紙包好麵糰，避免佢喺製作過程中變乾。
3) 隨意執起兩小團，分別放入點點色素或可可粉上色。
4) 再執起另外無上色嘅麵團，包入豆沙。
5) 加上已經上色嘅麵團裝飾。
6) 成卡通形狀之後直接放入熱水中，用細火煮熟即可。
糰子基本嘅做法就係咁喇！係唔係超級容易呢！快啲就喺呢個周末試下，準備定中秋用黎做賞月小甜點啦！
