人生喺求學階段完結之後，就會踏入另一個階段，需要開始為個人的事業打拚。但喺職場上打滾多年嘅時候，其實除左喺工作上累積到相關經驗之外，大家仲會喺工作上學到啲乜野特別嘅處事態度，又抑或係職場求生本能呢？
1. 笑聲係減壓最佳良藥
當遇上壓力嘅時候唔知點處理好？或者您可以試下為自己轉移視線，睇下或者諗下正面嘅好笑野，等自己笑出嚟，放鬆一下心情。而且其實喺處事方面如果出現任何困難，或者被人留難，您都應該要以一笑置之嘅態度去處理事件，因為工作其實就只係佔左你生命中嘅其中一部分，您仲有更多嘅野值得您去關心同感到開心。
2. 寓工作於娛樂
每日重複9至7喺苦悶嘅環境之中，自己單打獨鬥其實都真係非常難捱。但假若工作環境嘅其他人都識得寓工作於娛樂，有認真工作嘅時候亦懂得喺某啲時候玩下放鬆心情，其實工作效率都會因此提高。
3. 唔需要任何野都識
要贏得同事、下屬尊重，其實唔需要扮到自己乜野都識咁，更重要係要喺待人接物方面互相敬重，聽取大家意見歸納出最有效嘅處理方案，同大家一齊化解困難。要成為一位備受尊重嘅員工或者老闆，更重要係識得帶領大家尋找解決辦法，而並非爭取成為最聰明嗰一個。
4. 唔好輕視其他人
雖然佢呢一刻可能無獲任何人垂青，但其實當一個人肯發憤力爭上游嘅話，終有一日佢就會能夠遇上識得賞識佢嘅人，甚至會令佢爬得更高。所以對於目前比您職位低嘅同事，千萬唔好輕視佢地。
5. 唔好因為其他人嘅意見，而放棄自己嘅想法
如果遇上有人同您講你嘅諗法係達唔到，您未必應該即時放棄，更應該趁機重新檢視自己手頭上嘅工作，睇下有乜改善方法。因為當您肯努力為自己目標奮鬥，而且成功達成目標嘅話，大家都必定會對您刮目相看。此外就算您未必能夠一定成功，當中處事嘅經驗都足以令您獲益良多。
6. 要識得事先準備Plan B
因為會牽涉到唔同嘅人同部門，工作喺好多時候都會遇上突發事件，令您原本嘅如意算盤打唔響。因此無論喺任何嘅時候，喺做每一個工序嘅時候都應該要留多一手準備，等自己去到危急關頭都可以迅速應變，化危為機。
7. 為自己創造機會
機會並唔會好似故事一樣突然喺您面前變出嚟，而係需要您自己有份努力爭取，回報先至會出現。例如您發現公司有晉升嘅機會，但自己卻坐以待斃唔肯努力爭取嘅話，人地自然都唔會有信心比機會您。
8. 友情難能可貴
可能好多人都會喺職場上唔會有真心朋友，所以假如您喺工作上發現到一位真係關心您嘅工作夥伴嘅時候就應該好好珍惜。而且相比起深入同同事交往，簡單友善互相對待，認識對方就已經可以令雙方工作流程順暢得多。
9. 工作同感請唔好混為一談
喺工作嘅同時需要應對喺同一個空間工作嘅另一半，就算您自己可以控制到公私分明，但對於其他人嚟講都係有唔好嘅印象，甚至會延伸到出現影響工作氣氛嘅傳言，拖低部門工作效率。所以假如工作上係有衝突嘅話，或者您就應該細心考慮係唔係真係要發展呢段關係。
10. 唔好放棄夢想
如果目前工作緊嘅地方唔太理想，千祈唔好唔記得外面仲有另一個更大嘅世界，能夠令您實現自己嘅目標。工作其實只係人生嘅其中一個小部分，您嘅夢想可以喺工作之外繼續追尋落去，只需要您肯下苦功，努力不懈就可以達到。
