Chapter 3：大狀

（圖片來源：landroverusa）

講咗咁耐，係時候介紹自己。

我叫蘇志鵬，係一個大律師。「志鵬」呢個名係我老豆幫我改，當我報 JUPAS (入大學選科) 嗰陣，我老豆先話我知，原來我個名係嚟自當年「法內情」裏面劉德華嗰個孤兒大狀劉志鵬嘅角色。

偶遇葉生嗰一年，我二十七歲，咁啱同華仔當年飾演劉志鵬嘅年紀一樣。

由喺比華利山揸走葉生架林寶嗰日開始，我已經有四日冇見過佢，而佢亦都冇搵人聯絡過我。

直至星期三。

好記得嗰日係星期三。

當日我在觀塘裁判法院三號庭，代表的 client 是一位的士司機，他被控濫收車資。

嗰陣時香港有三個出名巴辣嘅女裁判官，其中一個叫朱艷芬，觀塘法院嘅三號庭通常都係見到佢。

正常嚟講，的士司機都唔會 bother 請個大狀幫佢哋打呢啲 case，但因為呢個的士司機係我老豆嘅老死，所以我老豆話無論如何都要幫佢。我同世伯一早有咗共識，佢話會認罪，所以我嘅職責只係幫佢盡量向法官求情。By the way，我老豆都係一個的士司機。

「我當事人其實唔知道行鴻圖道嗰條路線會比較遠，所以……」

「等等，蘇大狀，你話你當事人唔知？」朱艷芬冷冷地問，眸中閃過一道刺骨的寒光。

我 feel 到自己瀨咗嘢，心頭劇跳。「係。」我鼓起勇氣說，但細聲到幾乎只有自己聽得見。

「但你而家唔係代表你當事人認罪咩？」

「係。」雖然我個腦一片空白，但仍然飛快地轉動腦筋，嘗試想出到底自己說錯了什麼。

朱艷芬搖搖頭說：「如果你話你當事人係唔知道鴻圖道係較長嘅行車路線，咁呢個就唔係求情說話，係抗辯理由。」

我站在那裏，嘴唇顫抖，一動也不動，手指不其然地緊緊捏起來。

「其實你同你當事人有冇共識，到底係認罪定係唔認罪？」朱艷芬撇著嘴問。

我低著頭，右手裝作在枱上翻文件，但其實左手早已緊握成拳頭，門牙大力咬著下唇，是崩潰的先兆。

如果嗰陣有人問我，想唔想有朝一日可以做到叱吒法律界嘅駱應淦或者清洪，我絕對會誠誠實實咁答一句：唔想。準確啲講，唔係唔想，係唔敢想。已經做咗幾年大律師，但每次上到庭，尤其係對住呢個朱艷芬，我都會手騰腳震唔知點算。唔好話從未試過打啲咩高 level 嘅刑事案，就連一年前幫一個喺街市被懷疑偷咗兩個番茄嘅印傭打官司，我都已經口窒到差啲要食鎮靜劑。

而家仲要羞家到連……

「求情說話同辯護理由都唔識分，唔緊要，我唔介意用一分鐘時間幫你溫故知新。」朱艷芬說完後，旁聽席上傳來陣陣笑聲，我面上的肌肉不受控地跳了幾下。喺嗰一刻，我心裏面好憎我老豆，因為如果唔係佢想當年咄咄逼人，我根本唔會揀讀 law。

由細到大，我嘅志願都唔係做律師。

離開三號庭之後，我老豆的老死還要白了我一眼，說：「一早都同你阿爸講唔使哂時間㗎啦，而家咪又係罰咁多錢。」

心情陷入谷底，一個人落到法院大樓門口，本想盡快找部的士回家，但當我抬眼四望的時候，在我視線的終點，一部黑色的 Range Rover 停了在法院門口的左前方，即是鯉魚門道的禁區位置。有個皮膚黝黑，個子不高，頭髮染金的肌肉男站在那部 Range Rover 旁邊，一看見我便快步走過來。

無啦啦有個大隻佬衝過嚟，一下子讓我的心臟急劇地起伏了兩下。正當我想向相反方向拔足跑開之際，肌肉男把我叫停：「蘇大狀！」

我不禁凝住腳步，回頭的一剎，已撞上肌肉男那善意的目光。沒錯，despite his look，他有一雙善良的眼睛。

「係，我係，你係？」我疑惑地望著這雙確是善良的眸子。

「葉生喺車裏面，想睇吓你有冇時間傾兩句。」肌肉男指著那部 Range Rover 說，似乎他是葉生的司機。

「梗係有時間。」一聽到「葉生」兩個字，我的眼睛已立時亮起來，連忙跟肌肉男走到 Range Rover 的位置。

肌肉男打開右邊的車門，我一跳上車，便看見一個容顏挺秀，身穿白色恤衫的年輕男子，悠然坐在後座，雙眸凝視著一部黑色平版電腦的螢光幕。眼前這位葉先生，跟四天前那隻頹喪的醉貓，判若兩人。

「蘇大狀你好，嗰晚真係唔好意思。」葉先生伸出右手，目光精芒閃閃，口中雖在致歉，卻仍然一派強者風範。

「千祈唔好咁講呀葉生。」我嚴重缺乏跟大人物溝通的經驗，連我自己都聽到自己喺度口震。「反正我嗰晚得閒……」

「仲要麻煩你幫我睇住架車咁多日，呢幾日啲油錢我一定要計番畀你。」葉生的措詞客氣，氣度卻是從容不迫。

這時我才聽到原來車內播著微微的音樂，隱約聽到是林海峰的「男子組」。

等等，我突然有啲嘢諗唔明。

呢幾日啲油錢佢一定要計番畀我？呢幾日？其實葉生只係兜個圈同我講：嗱，我知呢幾日你都有揸我架車周圍去，不過我大方，幫你畀埋你用過嘅油錢，當係補償番你嗰晚車我返屋企。

係，我認，呢幾日我都揸咗佢架車去威，仲因為呢部車，我做咗一件成世人諗都冇諗過有可能做嘅事，就係同個o靚模開房。

問題一，點解葉生會知我呢幾日都有揸佢部車？從佢嘅語氣，我肯定佢唔係純粹估估吓。問題二，話時話，點解佢會知道我今日喺觀塘上 court？問題三，嗰晚我只係同凌小姐講我叫 Ryan，冇講到姓，佢點知我姓蘇？

呢三個問題都好易答，就係葉生本人又好，凌小姐又好，呢幾日都搵人查過我，甚至係跟過我。零懸念，搵人查我實在正常不過，畢竟當晚我撞破的，是必上娛樂頭條的驚天大新聞。佢哋想確保我真係冇周圍同人講，自然想知我接觸過咩人。

事實上，嗰晚嘅事，我真係冇同任何人提過。

我想不通的，並不是葉生為什麼要找人查我，而是為什麼他今天要親自來找我。

「點可以要你畀番油錢呢。」我帶點不安的說。「其實我應該同你道歉就真，我唔應該冇得你批准就用你架車。」

「哎呀，Samantha 畀得架車你，就預咗你會用啦，有乜所謂呢。」葉生語調悠悠，漫不經心地提起了凌小姐的名字。

一時間不知該說什麼，而在這時候，我的眼睛掃出車窗外，看見一直站在車外守候著的肌肉男，才醒起他剛才對我說，「葉生想睇吓你有冇時間傾兩句」。

「唔知葉生搵我有咩事呢？」我微笑著問。

葉生的目光清澈，笑容悠然自得，勾得我更加好奇。「有冇時間去我 office 再傾？」

你搵人查我查得咁透，我有冇時間，你清楚過我啦。「有時間。」我輕輕地說。

葉生敲一敲車窗，肌肉男聽見後立刻開門跳上車。「阿耀，返公司。」葉生說。

「知道。」肌肉男繫上安全帶，看看側鏡，準備出車。就在這時候，一聲巨響從我的肚內傳出來。每逢要上 court 的早晨，我都吃不下早餐，所以到現在也未有什麼到肚。

葉生忍不住笑出來，問：「西多啱唔啱？」

我紅著臉點頭，葉生叫阿耀先去九龍城。