因了解而分開，總比一輩子都同一個唔識得珍惜自己嘅人繼續糾纏落去嘅好。能夠再見亦是朋友固然係好，但有啲人總係會喺分開嘅時候鬧交收場，嚴重嘅更加會係口出狂言，衝口而出講埋啲非常狠毒嘅說話，令到雙方連朋友都無得做。
咁究竟去到分手嘅一刻，乜野嘅說話係最歹毒嘅呢？網友最近就此進行了一向調查，唔知你地又認唔認同呢？
10. 「我配唔上你。」
話自己配唔上自己嘅前度情人，聽就好聽，但講到尾咪又係爛藉口一個，比高帽人地戴，等自己好落台啲咁。
9. 「你好無家教。」
曾經聽人講過自己分手嘅原因，竟然係因為食飯嘅時候唔叫其他人食飯，而被認定為無家教。每一家嘅規矩都唔同，但如果分手都算上左對方父母嘅頭上就實在相當難睇。
8. 「我仲後生。」
換句話即係嫌人地老，同時唔想浪費時間下話？對唔住喎原來佢地自己唔識得為自己未來訂下目標，係因為被分手者耽誤左佢地嘅時間，係佢地嘅一個負累。
7. 「我只係想玩下者。」
玩弄感情仲要講到出面？！唔嬲就奇啦！但如果你係被講呢句說話嘅話，唔緊要嘅放長雙眼睇啦！因為世界真係有因果報應，風水係會輪流轉嘅！
6. 「我地有一齊過咩？」
相比「我只係想玩下者。」其實仲有另一句更加狠嘅說話，就係連雙方一齊過都唔肯承認，完全抹去左兩個人嘅過去，當無事發生。如果對方真係咁講出口，面對呢種人當然要即刻醒來立即抽身，唔好在留戀喺呢段感情上面。
5. 「我鐘意左另一個人。」
從自己嘅另一半聽到佢坦白承認移情別戀，自己個心當然係會好似被刀割一樣咁難受，而且不斷咁反覆思量究竟自己係唔係做錯左啲乜，同埋同佢喺埋一齊嘅時候佢係唔係已經開始一腳踏兩船。所以講出呢個說話之前，真係需要三思。
4. 「你等做老姑婆啦！」
唔想同人地喺埋一齊其實唔緊要，但詛咒人地一世都得唔到幸福就真係非常過分，因為可能只係講呢番話嘅人唔識欣賞者！
3. 「邊個同你喺埋一齊就邊個唔好彩。」
其實邊個同邊個喺埋一齊，係兩個人之間嘅決定，而且雙方係由自己決定，絕對唔可以怪某一方。所以講話自己同另一半喺埋一齊係倒楣嘅話，某程度嗰一個人都係自己攞黎，佢地都需要負責，而並唔係某一個人唔好彩。
2. 「同你一齊簡直係浪費我嘅時間。」
浪費時間？無人揸住支槍逼你同另一半喺埋一齊架喎！昔日歡樂嘅時光完全就被呢一句話摧毀，咁樣只係會令對方非常唔甘心亦都分開得不明不白。
1. 「我從來都無愛過你。」
從來都無，咁究竟之前佢係當自己係啲乜野？即用即棄嘅一樣物件？定係某些慾望嘅代替品？如果有人講得出呢句說話，嗰一個人應該係非常絕情絕義，雙方嘅關係簡直真係無法挽回。
