話咁快又嚟到去旅行嘅旺季喇！去玩之餘又點少得喺Facebook同Instagram打卡post相呢？不過下下都係自拍同風景相都幾悶㗎，一於學番幾招有新意嘅呃like影相方法傍身啦！
1.地圖+passport
仲喺機場候機室拎住本passport影相？唔好掛……想畫面豐富啲，不妨影埋手上嘅飾物或者指甲彩繪，襯埋個色彩鮮艷嘅背景，搞掂！又或者可以攤開地圖，影手指指住嘅目的地，配埋會執入行李嘅隨行小物，成個feel即刻文青哂。
2.相中相
影自己手機影緊嘅相，就會有「畫中畫」嘅效果喇！亦都可以用即影即有相取代相中嘅一部分，但記得畫面要盡量簡單，效果就會好啲。
3.踏遍天涯嘅一對腳
去到崖邊、雪山纜車上面呢啲半天吊嘅地方，雙腳懸空嘅相感覺就似飛緊咁，好free好特別呀！
（圖片來源： rebloggy.com ）
4.手中食物+靚景
無論係咖啡杯+歷史建築、椰子+泳池，抑或係酒杯+夜景，手中食物或者飲品可以反映出當地嘅特產，營造唔同嘅風格。
5.做「背多分」
影低自己嘅背影，可以畀到人多種唔同嘅感覺。如果喺海邊影會感覺放鬆，望住夕陽襯上城市景的背影，又可以畀人一種沉思、唔捨得走嘅感覺，大家不妨多啲試下！喺樓梯由下向上影，仲可以令自己望落更修長添！
（ 圖片來源：m.idiva.com ）
