同另一半相處嘅時候就算大家有幾合拍，難免都會有少許磨擦。但你又知唔知道其實除左明顯嘅爭拗之外，有時候並非刻意嘅某啲說話，同樣都會傷到另一半嘅心？如果真係因為呢少少有意無意嘅說話而令一段關係動搖，真係相當唔值得架！
如果你都唔想因為日常直接講出嘅說話，無意傷中到另一半嘅心，咁你就一定要留意下面呢10句說話，睇住唔好衝口而出喇！
1. 「你冷靜啲先啦！」
好多時候同另一半發生衝突，自己一緊張就會叫對方「冷靜啲先啦！」。誰不知咁樣講出黎反而會令佢火上加油，令佢覺得自己嘅意見無獲得尊重。
2. 「你點解可以咁多野架？！」
見到女朋友買咁多衫褲鞋襪、化妝品，忍唔住大叫左一聲「你點解可以咁多野架？！」。其實佢地呢啲嘅收藏同我地啲模型、手錶、遊戲又有咩分別？！所以都係唔好比壓力佢地喇，只係大家嗜好唔同啫！
3. 「快啲啦我地遲到喇！」
遲到其實大家都唔想，尤其已經係遲左到，佢地未搞掂手頭上嘅野就真係未搞掂，所以係咁催佢真係無咩大作用，反而仲會令佢地更加煩躁。假如遇上咁嘅狀況，最好都係比啲耐性等佢好喇，費事搞到對方全日都唔開心，自己都會好難受。
4. 「你隻潤膚露／頭髮隻spray／香水好臭。」
如果佢地噴得／搽得上身，其實佢地自己真係唔覺得有咩問題。假若您真係覺得隻味好難頂，或者更好嘅係用婉轉方式話比佢地知，例如「你隻香水令我個鼻好痕」咁，總比「哇你隻香水好臭呀」好得多。
5. 「我鐘意你唔化妝多啲。」
女朋友化行妝赴會，同你去食飯睇戲樣樣齊，但到最後一齊坐車番屋企嘅時候，您竟然同佢講「我都係鐘意你唔化妝多啲。」雖然呢句說話可圈可點，但其實某程度上有啲女士會覺得你咁講係辜負左佢地一番心意，畢竟佢地著左咁靚都係為左想你開心。
6. 「你唔記得執番浴缸啲頭髮。」
女士其實都知道自己一洗完頭會留低大量頭髮，所以其實講得多真係會令佢地好尷尬，因此有時候都係幫手執左佢就算啦～
7. 「我瞓緊覺，可唔可以閂左個吸塵機。」
當另一半忙緊打掃，自己唔幫手不特止仲攤喺度話佢好嘈，咁樣當然令對方抓狂，對您嘅態度非常不滿啦！仲講？快啲起身睇下有咩幫到手仲好啦！
8. 「今晚可唔可以你煮？」
每個人都會有疲累嘅時候，所以如果佢地嗰日唔想煮飯，就無謂強人所難，大家叫外賣休息一晚啦。
9. 「我地不如.... 咩囉？」
如果想同另一半親熱，相比毫無情趣咁直接講出口，不如以行動表示更加實際。與對方熱吻、撫摸佢地嘅身體刺激下佢地，咁樣反為更加博得另一半歡心。
10. 「你好反瞓搶晒啲被！／你瞓晒成張床喇！／你流晒啲口水落我度！」
瞓著左嘅動作其實真係無人控制得到，所以真係無咩野好拗。如果成日都好認真咁為左啲咁嘅事爭執，或者您就需要冷靜一下。
