男士必讀：搵老婆攻略！

本人都做左幾十歲人，有老婆有仔女，未退休仲做緊，但後生細仔時完全無人教我如何選老婆，呢種咁有應用哲學教育意味嘅問題，老豆老母無教，中學會考、A level 都無教，大學都無宿友同你傾過。

作為過路人，我覺得要同後80後、90後分享，回饋社會，服務人群，造就各位港男下半生幸福，減少香港離婚率及社會問題，正正是本人寫這篇文章的目的。

回答問題之前，我想先要有一些假設條件，否則以下答案未必適合。

假設環境條件：
① 收入中等
② 相貌普通
③ 無家底
④ 住喺97後的香港
⑤ 行緊高地價政策

我估以上條件已經佔了很大多數港男的環境條件。

找老婆之前就先要講找女友，因為無女友就無老婆，不能跳step，但有一點要提一提大家，就係應該讀完書出來工作時，趁住份工未算压力大工作忙時，要盡量識多些異性，否則當份工愈來愈忙時，你就更加難抽身找女友。

女友條件：

樣貌
後生果時覺得呢個好緊要，但樣貌查實唔係咁重要，因為過左十幾年後乜都會老同厭，所以成日聽到話二奶無大婆咁靚都咁多男人鍾意就係咁解。我意思不是教大家專登找個樣差d嘅，我意思即係如果性格、脾氣條件更好的，不妨找個樣差少少的來做補償。如果可以的話，找個非主流派別的就最好，何謂非主流？例如，有些男仔喜愛單眼皮女生，出面主流一定係鍾意大眼妹，咁你硬要找單眼皮女生呢類，自己又鍾意，出面又無乜人同你爭又少d競爭對手，何樂而不為？總之求順眼就算，唔好太奢求。

身材
香港女生做普遍矮同平胸，呢個係廣東人種問題，如果要做選擇的話，我認為只要唔好偏肥就ok，因為肥通常都同論盡掛鈎，再者如果連自己身型都管理唔到，點樣比佢管理頭家？當然你找到個高佻走肥就係bonus啦。如果要快速睇到佢20年後的身型，我建議你見一見佢阿媽就略知一二。

性格
呢點好重要，因為性格影響到行為，我們細細個就學德智體群美，但真係有幾多個學到？一開始就拍拖就一定係甜蜜，因為愛情係盲目，過左一年多啲，愛情感覺少左，分泌的多巴胺少左，你就睇清楚好多，究竟佢係咪適合自己，因為性格不合，就好影響日後大家過嘅日子。例如，假設對方係悲觀格，又不是務實型，所有事情又要落喺你身上搞掂晒佢，咁要問自己可否勝任？因為我認為拍拖好簡單的，但日後結婚生仔生活先係重頭劇，如果對方係樂天陽光格，又肯做幫輕你先係最重要，大家記得唔好淨睇樣咁膚淺。情況同你細個同同學一組做project咁，你想同一個上進做嘢嘅同學一組，定係同一個求其碌過靠晒你嘅同學一組？

脾氣
呢點個人認為都好重要，如果條女事無大小，成日黑口黑面，發晒小姐脾氣，又要氹又要呵，你可能會忍到一時，但係忍唔到一世的。試下想像一下放工返來，得番半條人命，又見到個老婆黑口黑面話你遲返，發晒脾氣，仲要你氹，講野無尾音，問一句答一句，全世界欠左佢咁，問你點頂？最終一定比市場懲罰，離婚收場，因為你不能長期「扭曲操作」，即成日氹佢，最終咪費時失事又要找過個老婆，一係啞忍一世。如果想快速知到條女脾氣如何，查實好簡單，留意佢點對親人，對老豆老母兄弟姊妹時d語氣，待人接物態度就明晒。

學歷
雖則學歷高唔代表賺錢多，但起碼學歷高啲，比公司裁左都易啲找到工作，加上學歷高啲，理論上佢智商都應該高啲，當然啦，你選人人都選你，你自己都唔高就唔好要求太多了。

年紀
後生細仔時，淨係識得喺自己同齡果堆到找女友，呢個想法其實好錯，如果真係選老婆，應該找細過自己三至八年為原則。因為男性心智係低過同齡女性的，啲女個個都想喺死線27、8前結婚，30歲前生仔，咁試問家陣咁高樓價咁低人工，邊個無家底嘅男生真係做到？你硬係要找同齡的，咁你要有心理準備佢可能會做高齡產婦。剛睇了一篇文章，從生育來說，最好差7年，因為男的35，女的28，這個生育組合就最好。即係話，當你30歲拍拖，同個23、4歲的，不知幾好，佢又咩都信晒你，話晒你社會工作經驗同智慧都win晒，可以輕易駕馭佢。當然啦，後生時，你得20歲你，你找個14歲就唔practical啦，但年紀大啲，你就知呢個組合先係王道。後生時好易誤以為爭幾年無可能囉。

我都做左好多好多年cd-rom, 第一次post文，仲要怕比人認出，開左個新account，講咁多無非都淨想各港男早日找到個好老婆，千祈唔好淨睇樣而忽略性格脾氣呢啲重點，如果比我選我寧願要個相頭差少少，但樂天陽光女生陪我度過下半世。因為相愛很易，相處很難，尤其我哋生活喺呢啲政治混亂97後社會，高樓價高通脹，向上游機會又唔高，當你為柴米油鹽食住屋交通衣服交通問題煩緊嘅時候，佢嘅性格脾氣先係最重要，呢啲先可以扶持你同你一起過難關的。最後，大家都要記住，你選人時人選你，例如，你又不能自己脾氣大又要求人家仲會小鳥依人咁對你，否則又係比市場懲罰，分手離婚收場。

來源：discuss