妳劍橋夠未？

入娛樂圈，顧名思義，工作是要娛樂人。

一係要你唱歌好聽，一係要你做戲好睇，兩樣都唔掂？好，上去無敵獎門人，畀人糟質，喺你面前爆氣球，起碼要嚇到你叫，最好嚇到你瀨埋尿，觀眾開心，娛樂他人的責任成功。

生活已經好大壓力，現實已經殘酷不堪，所以我打開電視，望住你班藝人，就係要你令我忘記生活，忘記現實。

偏偏，望住你呢個藝人，娛樂唔到我不單止，你仲要話畀我聽，現實，其實係畀我想像中更殘酷。

觀眾討厭她，我絕對理解，因為我一路看也在一路酸。

「劍橋生呢個名，絕對得來不易㗎」

夠啦……

「非一般嘅劍橋生，當然有非一般嘅劍橋生活啦！」

真係夠啦。

我睇電視，係要你娛樂我，唔係要你顏射我。

開口十優，埋口劍橋，點解你要令我覺得自己咁渺小？

所以我絕對同意其中一個網民說，難怪你冇乜朋友。

噚晚發惡夢，夢見佢。

我同佢講：「你咁乞人憎，抵你冇朋友。」

她呷一口 English breakfast tea，優雅，I mean 懶優雅地對我說：

「我有冇朋友，應該唔使同你交代。我喺 facebook 有幾多 friends，電話簿有幾多 numbers，大概係 none of your business。」呢個夢真係好迫真，佢嗰啲咩「應該」、「大概」，完全係典型英國人嘅委婉。

佢未講完。

「不過我認，我認我選港姐嗰陣冇朋友，我認我喺呢個電視台冇朋友。做朋友，就算唔係，都起碼要啱吖，呢度邊會搵到人同我啱？即係好似先生你咁，你入到嚟劍橋牛津，一樣唔會有朋友。」

佢終於講完，我跟手推咗佢落泰吾士河。