好多人話出去第一次約會，只要做番你自己，而且識得基本禮貌就得。雖然個個兄弟都會同你講：「無野架喎！順其自然啦你！」之後更加會慫恿你飲番一小杯壯下膽就一定得，但與其估估下，不如都係睇番啲有晒科學根據嘅識女仔TIPS仲好啦！
▼保持良好溝通▼
保持良好嘅溝通係第一次出街最需要留意嘅重點，而且所要求嘅係要你可以用有意義嘅問題帶動雙方之間嘅互動。對於你應該發問嘅問題，研究就指可以試下問一啲平常人唔會問嘅問題，例如問番啲你真係想知道答案嘅問題，或者輕鬆啲同對方約定要問大家5條超大膽嘅問題，咁樣就可以將對方抽離緊張嘅情緒，更加令您地加深認識。
▼唔好剩係答YES／NO▼
好多男士習慣喺傾計嘅時候，都只會簡單答「係」同埋「唔係」就算，令人無法追問落去，話題亦都會因而停止。而且亦都因為呢個原因，男仔喺主動同對象講野嘅時候，就會唔識得喺一開始嘅時候講啲可以延伸落去嘅話題，令到氣氛非常生硬，兩個您眼望我眼，非常尷尬。
▼唔好望到人實一實▼
有眼神交流係好，但研究同時發現過量眼神接觸，或者係過分進取嘅眼神，其實都會嚇怕對方。研究指出如果同對方Hold住視線太耐，其實反而會令對象覺得您想控制住佢，因此最好就係能夠克制到自己望住對方7-10秒就夠。當然，過少嘅眼神接觸亦都會令您顯得非常無自信，降低對象對您嘅好感。
▼約會要食甜食▼
根據2014年普渡大學嘅研究，甜食所帶有嘅糖分其實係能夠誘發人們有浪漫嘅想法。喺呢項研究當中，研究人員就曾經向約會嘅情侶喺第一次見面之前飲含有糖嘅飲品，並且幻想自己嘅對象所飲嘅係清水，結果研究發現有飲含糖飲品嘅測試者對於親密嘅行為會較為開放，證實糖分係刺激浪漫思維嘅元素之一。
▼約會由循例食飯改為動態活動▼
美國麥肯德里大學曾經發現，假如要求測試者喺運動15分鐘之後觀看異性相片，佢地會因為腎上腺素嘅上升而覺得相中人更為吸引。所以下次約會嘅時候，您或者可以將平常坐定定食飯改為攀石、打羽毛球等動態活動。
▼不自覺咁模仿對方▼
當您喺不自覺嘅一刻開始模仿對方嘅行為、表情、動作，咁就代表你真係好欣賞同埋鐘意對方。研究指出模仿對方嘅行為除左代表您讚賞對象之外，更加意味左你想對方喺你身邊嘅時候感覺更加自然，能夠自在咁同你一齊共度時光。同樣地如果您發現對方模仿您嘅一舉一動，其實都一樣意味左佢地對您有好感。
▼睇下對方腳掌▼
呢個建議並唔係為「腳膠」而設，而係腳掌其實係可以睇得出對方係唔係對您有興趣嘅其中一個方法。腳掌距離腦部最遠，亦因為咁嘅原因人對於腳掌嘅控制會相對較小，意味多數由潛意識操控，更加容易反映出人嘅最真實情緒。因此如果對象經常都用腳掌指向您嘅方向，咁就意味佢地對您相當有興趣，想更加了解您，相反如果腳掌向外，咁就代表您唔係佢地心儀對象，好想快啲離開。
▼注意身體接觸▼
身體接觸其實有三大類別，第一類就係「友善」，即係輕輕以拍打嘅對方同對方接觸，以及握手等。第二類「可圈可點」就即係觸摸手腕或前臂較為敏感部位。最後第三類就係「親暱」，例如接觸到對方面部位置。假如對方對你係信任嘅話，不妨可以將自己對對方身體接觸嘅程度保持喺第二同第三之間，當然如果係初次見面，就最好保持喺第一就好，避免冒犯到對方。
