要令到人地對自己有最好嘅第一印象，最重要要執正嘅就一定係自己嘅衣著，令人見到你都睇得出你性格之餘，仲要著得得體唔會失禮自己。但係喺自己按住個人偏好搭配衣服嘅時候，有唔少嘅人就會過左火位，只顧個人喜好而忘記左人地都有份對你嘅衣著評分。
咁對於女士黎講，男士乜野嘅衣著係最唔見得人、最趕客嘅呢？
10. 牛仔短褲
天氣暖少少，有人就會鐘意著番條短褲散散熱。但喺揀咩款式嘅時候，有啲人就唔知點解會偏好有留鬚邊嘅牛在短褲。雖然自我感覺良好，但對於女士黎講原來呢種咁嘅款式係好肉酸嘅，不如著番條chino短褲仲好啦！
9. 瀨屎褲
瀨屎褲鬆泡泡、就跌就跌咁嘅款，真係睇見都覺得著個個人不修邊幅，露左半條底褲出黎真係唔知佢想點。仲有瀨屎褲點睇都係一舊野咁，完全展示唔到男士身型嘅優點。唔好話女士丫，就算係男仔見到都唔開胃，著番條啱身嘅牛仔褲靚靚仔仔，睇落個人都無咁爛撻撻啦？！
8. 紳士帽
軟呢帽／禮帽其實真係唔係個個人都戴得起，唔啱嘅話戴左衰啲講句係會好似乞丐咁。所以都係咩都唔好戴就最安全，同埋如果你嘅髮型係OK嘅話，咩都唔戴就已經好好睇啦！
7. 留錯鬚根
鬚根如果無好好打理又或者唔識打理，又係好容易就會比到人好污糟嘅錯覺。如果一個男仔無好好打理自己面上嘅鬚根，睇上去唔單止會唔靚仔，仲會好似無晒精神咁。
6. 裝飾用眼鏡
對於有人無端端無近視、遠視、散光都拎副眼鏡黎戴，有網友坦言睇上去好似傻仔一樣，有種好扮野嘅感覺。所以就算你真係戴，都唔好咁張揚話比人聽自己係裝飾用，費事比唔鐘意嘅人指指點點，令自己唔開心啦...
5. 拖鞋著襪
拖鞋著襪喺外國文化裡面，絕對係最忌諱嘅一種穿搭，因為只有不修邊幅嘅退休阿叔先會咁著，非常老土。同埋著拖鞋就著拖鞋啦仲使咩著襪，要著襪就著鞋先著啦！
4. 攝唔係設計黎攝嘅衫
如果你件衫係比較長嘅話，咁件衫就有設計過比你攝入褲頭入面，但相反如果你件衫本身唔夠長，就唔好攝入去喇，因為一定唔會好睇！記住唔係件件衫都係啱攝架！
3. 有褶卡其色西褲
前面睇上去有褶嘅卡其色西褲，最忌諱嘅一種穿搭，老土得黎條褶仲會令人睇落你條褲好似無熨過咁，睇到人眼都花埋。如果你想著卡其色嘅褲，最好都係揀番條無褶，兼且有貼身剪裁嘅Chino褲，睇落個人都後生啲，更有活力。
2. 太大／太細件嘅衫
有啲人為左突顯出自己有胸肌，就會專登搵件細一個碼嘅Tee黎著，其實對於第2個黎講，一睇其實就知道你著緊件唔啱尺寸嘅衫，件衫點都唔會著得你個人好睇。相反如果你係著一件剪裁適合、度身訂造嘅衫，大家反而先會睇到你最好嘅身材。
1. 巨大圖案／字嘅衫
衫上面句字反映到你做人嘅態度，或者衫上面個大品牌Logo反映出你個人品味？唔好咁幼稚啦... 見到真係咩品味都一掃而空，唔通你係流動宣傳板咩？都係收番埋喺屋企先著啦...
