好多人都話八卦係女人嘅「天性」，無論咩年紀嘅女人都係會有住八卦嘅呢個本能。究竟咁樣嘅講法有冇科學根據？最近喺日本當地，就有一位心理學家進行了相關嘅研究，深入探討左呢個好多人都想知道嘅問題。就等我地一齊黎睇下研究者澀谷昌三係點樣解釋啦！
▼八卦係求生本能之一▼
心理學家澀谷昌三認為，「八卦」其實係人類嘅一種社交行為，主要係受求知慾所影響。只要有人聚集嘅地方，人就必定會起「八卦之心」。根據美國韋伯州立大學的溝通學教授蘇珊博士嘅理論，「八卦」所觸及嘅話題就算係有幾無關痛癢，都係能夠有效加深人與人之間嘅認識，同一時間亦都係認識陌生人嘅一種重要方法，搜集有關對方嘅情報。
另外從生理角度黎講，人類八卦嘅時候都係會分泌出類似多巴胺嘅化學物質，能夠有效提高人體孕酮〈黃體素〉濃度，緩和人們所感到嘅不安及產生嘅壓力。
▼八卦嘅用途係保護自己▼
咁點解女人會特別鐘意八卦？主要原因似乎就係為因為要保護自己，確保自己嘅地位，同跟自己差不多嘅人聚集埋一齊壯大聲勢。而且幾個女人仔聚埋一齊，就最能夠有效地組織搜集情報，再加上女人鐘意傾計，所以就會令人覺得有「三個女人一個墟」嘅感覺。此外藉住八卦嘅話題，女士亦可以確定圈內朋友係唔係同自己有類似嘅價值觀。
▼八卦話題：血型&性格▼
喺唔少嘅八卦話題裡面，無論日本定係香港，除左星座之外，近年黎仲多左人研究大家嘅血型，認為血型能夠反映人地嘅性格。但究竟呢個諗法有冇科學根據？心理學家表示：「完全沒有！」因為人類嘅性格，其實係同時受遺傳及成長環境所影響的，並非血型。
而大家之所以覺得血型測性格會非常準確，成日開口埋口都用血型概括人地嘅性格，主要都係因為佢對人際關係感到不安，所以先會用某種指標定義或者談論別人，取得自己安心。
