(圖片來源:http://static.euronews.com/articles/328440/1200x630_328440_an-egyptair-passenger-plane-headin.jpg?1459237616)

埃及航空(EgyptAir)日前一架A320客機發生劫機事件,嗰位劫機既男子穆斯塔法(Seif El Din Mustafa),以身上綁有自殺式炸彈為名,挾持客機,要求喺塞浦路斯南部既拉納卡(Larnaca)機場降落;經談判之後,先釋放機上大部分乘客,最後留低咗四名機組人員,同另外三名外國乘客,事件前後擾攘咗六小時,終於平安落幕。但係,被挾持既外國乘客當中,其中有一位竟大膽到揾劫機者Selfie!


當局最後雖然表示,今次劫機事件與恐襲無關,而所有人質最後亦平安獲釋,但事件落幕之後,其中一位被挾持既英國乘客英尼斯(Ben Innes)上載咗一張相,反而嚇倒唔少人!佢喺網上曬出一張自己同劫機者既合照,相入面既佢仲全無懼色,反而笑容滿面,而旁邊既穆斯塔法身上仲疑似綁住炸彈!

當時英尼斯將自拍照send俾朋友睇後,仲叫對方即刻睇新聞發生咩事!佢朋友知道成件事之後當然嚇一大跳,仲話覺得佢好瘋狂,但就話呢個就係英尼斯,佢性格就係咁。事後,英尼斯接受訪問時講返當時情況,就話大家當時坐喺機艙裏面空等,但佢就諗到要同穆斯塔法合照,仲叫人幫手翻譯同影相,而穆斯塔法亦都聳聳肩表示同意,結果促成呢張Selfie。