「未出發，先興奮」係唔少人去旅行之前嘅必有心理狀況，覺得現場旅行嘅實景一定會好似旅遊書一樣咁理想、咁靚同咁浪漫。但講真如果你係去旅行既常客，你就一定知道書入面嘅，十居其九嘅其實都係發夢先會係咁既樣，因為現實中既佢往往都係令人受盡衝擊，完全走樣咁。
咁究竟世界各地既著名景點喺現實之中，係同書入面差幾遠？？睇完以下嘅對比圖之後，或者你就會再三思一下旅行嘅大計呢...…
▼法國羅浮宮的蒙羅麗莎▼
蒙羅麗莎對住你笑？係就係呀，但其實係笑你班傻仔圍住佢塊玻璃係咁影，都唔明你地做咩有其他達文西嘅畫都唔睇！離遠睇住大約只有一張A4紙咁大既蒙羅麗莎，同時又比前後左右既人係咁推，真係唔知自己係為個逼字定真係睇幅畫呀！
▼法國凡爾賽宮鏡廳▼
鏡廳係凡爾賽宮裡面，最為人熟悉嘅房間之一，除左係因為路易十四之外，近代史喺一戰之後，凡爾賽條約都係喺個度簽署，所以真係歷史中非常重要嘅一個場所。鏡廳有咁多鏡，自拍咪會一流？唔好講笑啦你知唔知凡爾賽宮每一日係有幾多遊客參觀呀？仲要每一個廳基本上都係非常咁細，到時又係影人頭架咋！
▼意大利比薩斜塔▼
一講到比薩斜塔，第1樣諗到既就係要影番張托住個塔嘅靚相。誰不知去到個陣先至發現，同自己諗法一模一樣嘅人，多到好似毛毛咁成個草坪都係。影咩丫影，點就都係一大堆人入晒你鏡架喇！
▼意大利特雷維噴泉▼
好多人都因為N年前睇過衝上雲霄，而經常夢想要去意大利特雷維噴泉，想要喺噴泉前面掉番個銀仔許個願，順便影番張相呃番個Like。哈哈，你簡直係諗得太過完美喇！因為特雷維噴泉無論係咩時間去，D人都係多到密鋪喺噴泉前面既每一個石級上面。就算比你去到泉邊，最後同樣都係要慢慢排隊坐底影，影完又要即刻閃開比下一個人影。所以話邊會咁完美架！？
▼馬爾代夫水清沙幼嘅海灘▼
卡通片曾經講過馬爾代夫嘅沙灘係水清沙幼，好似天堂一樣咁無敵。但其實水清沙幼呢樣野，好睇你去邊個島嶼。如果你咁唔好彩去左個管理不善嘅小島，再加上前排打過風嘅話，咁就可能會係滿目瘡痍，同幻想差好遠架喇！
▼希臘聖托里尼小白屋▼
希臘聖托里尼小白屋係唔少人心目中完美既國度，發夢都會想住喺個度。但就係大家都知道聖托里尼小白屋好鬼吸引，好似童話故事嘅小島一樣咁完美，所以每年都有大批遊客前往觀賞。亦都係因為呢個原因，聖托里尼小白屋嘅實景咪就係人山人海，咩景觀都係睇住D人囉！
▼尼泊爾珠穆朗瑪峰▼
其實唔理你係喺尼泊爾定中國登山，珠穆朗瑪峰每年既4至5月登山旺季，都係人山人海咁多人。更甚嘅係珠穆朗瑪峰並唔係人人可以爬，講既唔係你嘅體力，而係你有冇咁多既錢買登山證或者係裝備。就算好喇比你上到去，你都會發現上面其實係滿布長期無人執番落山嘅垃圾、氧氣筒，仲有既就係登山沿路嘅死者遺體，你估你自己真係睇緊戲咩？
▼巴西里約熱內盧海岸▼
講到火辣辣嘅巴西，大家最想嘅就一定係去嘆一嘆日光浴，享受完美嘅陽光與海灘假期。但亦因為巴西海岸太過著名，基本上去到海灘要搵個位舒舒服服坐底都好難，仲有人一多自然沙灘上面就有好多沙灘老鼠出沒搵食，又點會令你可以放鬆心情好好咁去玩個夠丫？
▼英國巨石陣▼
英國神秘嘅巨石陣，係唔少去英國嘅朋友必到嘅一個景點。但想像往往都係比現實的距離很遠，因為基本上去到巨石陣，大家都只能食住大風，從遠處遠眺巨石陣的型態。更令人匪夷所思嘅係聽住佢景點個聲音導航器，聽晒成個官方都無一個確切嘅答案比到大家個陣係點樣形成，以及有咩用處，同就咁睇住巨石陣咩都唔聽係無分別嘅。而且假若您想喺黃昏去嘅話，又係準備影人頭啦！
▼印度豪拉大橋▼
印度豪拉大橋喺相入面真係非常平靜，尤其係喺黃昏嘅時候，真係非常優美。你都識講係相中啦...…現實中嘅河水實況，現場嘅氣味都係唔能夠睇相睇得出黎。去到河邊原來係咁多垃圾又臭氣沖天，仲點會影得落手？快D睇完就快D走算啦！！
資料來源：BoredPanda
