過去Apple發佈會裡面，只要一聽到Steve Jobs一句「One More Thing」，大家就知道一樣全新產品將會出現。而今年發佈會中，就成為Tim Cook接手Apple以來，第一次以One More Thing方式進行產品發佈：Apple自家製做嘅智能手錶Apple Watch，價錢將會係美金＄349起，折合港幣＄2,700左右，並將於2015年春季開始發售。
傳統錶冠變Home鍵
係操作方面，Apple Watch除咗一般觸控屏幕，仲將唔少傳統手表上嘅「錶冠」（機械錶上用來上鍊、或調整時間個轉鈕），改做成可以將畫面放大縮細、將畫面上下滾動、以及有如iDevice上嘅Home鍵。不過以過去眾多iPhone、iPad，都會因為使用過度死Home鍵呢個情況為例，筆者擔心呢個情況同樣會出現於Apple Watch之上。而錶帶方面，雖然Apple今次又有自己一個新規格，但係以滑出滑入換帶方式，比起好多智能手錶都方便得多。
健身功能無遺漏 通訊功能一樣齊
而係功能方面，Apple Watch自然唔少得運動及身體驗查兩個功能，除咗基本嘅步行計之外，錶底仲加入脈搏監測器，去監察用家運動時嘅身體情況。當然，佢地為咗鼓勵用家去運動，仲係軟件上加入Apple Watch專用運動Apps，以打機一樣方法，俾完成一個虛疑獎章，給每日運動量達標嘅用家一種認同。（虛榮心果然係人類最大動力啊）
而另一方面，雖然Apple Watch都係要同iPhone一齊使用，不過同Google嘅Android Wear相比，Apple就係通訊方面下咗唔少功夫。例如可以用手繪圖方式、點擊傳送震動訊息、從文字中辨別出可能嘅答案供用家選擇，呢方面可以話係完勝。不過佢亦都同Android Wear 有同一缺點，就係仲未可以用來當藍牙免提咁講電話，真失望。不過依家無，唔代表將來都無。大家都知Apple幾鍾意係新iOS加新功能，再加錶裡面本身就有Siri功能，即係最基本收音已經做到，剩低就只有點樣俾iPhone可以同時配對到兩樣裝置。
最後不得不提，就係價錢方面，暫時已知美金＄349只係最基本Apple Watch，因為仲有防水防撞嘅Apple Watch Sport、以及走貴氣型、18k金及玫瑰金錶殼嘅Watch Edition（又名Apple 土豪版），都會有另外一個價錢，只係尚未正式公佈咁解。
