人有幾多個十年，難得儲到錢就自然要玩盡啲，連酒店都要當成旅遊一部分！尋日筆者就介紹過五間一生人必去嘅型格酒店，今次介紹埋剩低五個。雖然你未必咁快有錢去到任何一個，不過就當係俾個人生目標自己、又或者Weekend無野做，上網等自己眼睛「相」旅行都好。（即係睇相當自己去咗旅行）
6.Montaña Mágica 智利
想試下童話式呀酒店係點？去試下智利Montaña Mágica啦（英譯：Magic Mountain）。傳說個魔法可以實驗每個住客願望，呢個當然只係一個酒店PR講嘅Gimmick野。不過睇下間酒店就建築係成個假山入面，加上連接著酒店嘅吊橋，以及被樹林四面圍繞嘅環境，就好似《魔戒》入面精靈住嘅森林一樣。不論有無魔法，剩係呢個環境就已經值回房租。
7.Katikies Hotel 希臘 聖托里尼島
希臘聖托里尼島，可以話集希臘及地中海景點於一身：白色小屋、愛琴海海景，再加上名勝古跡，簡直係渡假好地方。不過島上面嘅Katikies Hotel，亦係一個酒店加天然景點。
事關酒店本身座落於著名嘅山城伊亞之中，房間除咗可以一覽地中海美景之外，重有著全白色嘅裝潢，完全配合到地中海風格之外，再配合埋碧藍色天空，一整個美景就係你眼前出現。當然，重有佢個白色石山洞泳池，係成間酒店最靚嘅地方。
8.Attrap'Reves 法國 普羅旺斯 阿洛市
酒店房就住得多，但係著係個透明波入面你又試過未？位於法國普羅旺斯，一個叫阿洛市嘅酒店Attrap'Reves，就將一個個巨型膠波變成酒店房。雖然睇落好似無乜私隱，但一到冬天落雪個陣，成間房就好似落咗一層糖霜Coating一樣。當然唔鍾意落雪的話，普羅旺斯一年四季落雨都幾頻密，到時大家都可以試下睇落雨打落屋頂，被雨點包圍著咁渡過充滿詩意嘅一晚。
9.Hotel Kakslauttanen 芬蘭 薩里瑟爾卡
想長時間都有雪睇？咁就要去芬蘭嘅薩里瑟爾卡Hotel Kakslauttanen住下，而且重可以體驗一下雪屋（Igloo）係點，因為每間房都以係獨立屋，並且有個透明頂屋頂設計。好彩的話，仲可以從屋頂睇到天上面嘅極光。唔係好多地方體驗得到。
不過去個陣記得要搞冬天先好去，唔係無乜雪個陣就真係無乜好睇。
10.Elkep Evi Cave Hotel 卡帕多細亞 土耳其
就咁睇相，可能大家以為睇緊電影入面個啲沙漠古城。其實呢個係土耳其一個叫卡帕多細亞地區嘅一間酒店：Elkep Evi Cave Hotel。裡面最大特色就係成個酒店都係依山而建，成間房都係個山度鑿出來。所以每間房都有一種好Raw嘅建築風格。再加上卡帕多細亞個沙漠環境，成間酒店散發住一種特殊異國風情。
