人一世物一世，去旅行自然要有咁盡玩咁盡。不過你又知唔知，其實住酒店都係去旅行玩嘅一部分？唔係講緊個種所謂Hip Hotel、五星級民宿、或者個種排十世都輪唔到你住嘅地方。而係真真正正，認真有獨特賣點嘅酒店！筆者會一連兩日，介紹全球十個型格酒店。
1.The Manta Resort 奔巴島，東非 坦桑尼亞
想試下訓係水底，睇下啲魚點樣遊來遊去嘅感覺係點，但又唔敢去學潛水？係東非坦桑尼亞嘅奔巴島，就有間The Manta Resort提供一種與別不同方法畀你去實現夢想。
The Manta Resort除咗有著非洲海邊酒店特色之外，最大一個賣點，就係佢其中一個套房係位於珊瑚礁中間，有著50米水深嘅藍洞上面。而其睡房就正正位於水面之下，日頭可以憑陽光睇到海底下優美環境、夜晚則會利用窗邊燈光吸引魚群遊近，帶來另一番特別景色。而缺點方面，應該就係出入都要靠船仔或者游水、以及上網方面要去返大堂先有。
不過去得旅行又上乜鬼網，繼網幾日嘆下世界好過。
2.Ladera Resort 聖露西亞，加勒比海
下完海，就係時候上山玩下喇。而為於東加勒比海嘅聖露西亞，就有一間位於山頂上嘅Ladera Resort。不話係房間定係泳池，都可以欣賞到皮通山脈以及加勒比海自然美景，試問咁嘅景觀係香港邊度搵得到？（OK，就算去澳門都未必搵到）
3.Äscher cliff restaurant 瑞士
雖然並非正式酒店，不過位於瑞士嘅Äscher cliff restaurant，其實都有提供小量住宿服務，不過要上去就有小小麻煩，因為大家都會建議你行三個小時山路上去。不過當你去到，見到瑞士獨特嘅藍天白雲山景就已經值回栗價，再加上餐廳部分係利用自然地型及山洞而建，傍晚時候去到你會見到一番特殊景像啊。
當然，筆者就建議Back Packing咁去，唔係拖著行李上山，隨時行到你腳都跛。
4.Loisaba 肯亞
點樣可以真正地去體驗大自然？但又唔使訓草地訓成晚咁激？咁就不妨試下非洲肯亞嘅Loisaba酒店。佢都有個特別服務叫星床（Star Bed），可以俾你租一張房外大床，俾你訓係出面睇下滿天星星嘅夜空。而且星床本身重有透明嘅蚊紗係度，雖然唔保證百分百無蛇蟲鼠蟻入去同你Happy together，不過最低限度唔會阻著你欣賞非洲無光害污染嘅星空。
5.Poseidon Undersea Resortl 斐濟
頭先介紹過嘅坦桑尼亞The Manta Resort，就有間睡房係水底。不過跟著要介紹呢間位於斐濟嘅Poseidon Beach Hotel，就直頭成間酒店都係水底入面：由你住緊間房到酒店大堂，全部都會係海面之下，好似電影入面科幻城市一樣。
唯一問題嗎…就係由07年講到依家都未搵到個適合地方起酒店，唔知駛唔駛等到2046先住得到。
