【湯水】粟米紅蘿蔔菜乾湯

早前去南丫島郊遊時，我都買左啲特產返屋企煲湯，買齊晒材料就當然係即刻煲返個粟米紅蘿蔔菜乾湯啦。

我其中一樣戰利品就係菜乾。

菜乾湯其實我都係比較少飲，因為菜乾都係比較寒涼，對於我寒底人嚟講都真係少飲為妙。不過，見到都好似幾靚同埋一包包住比起街市見嘅乾淨好多，都有啲興趣。加上菜乾含粗纖維，對消燥解熱及潤肺都有好處，我又見好耐冇飲，所以都都有啲心思思。

正當我15/16之際，店員姐姐就教我係煲湯時加埋果皮紅棗一齊煲，咁就可以平衡寒熱。

就係咁....我今日就買齊材料，依住店員姐姐教我嘅方法，煲粟米紅蘿蔔菜乾湯啦！

材料：

菜乾　　2棵

豬肉眼　約$40

紅蘿蔔　1條

粟米　　1條

紅棗　　8粒

蜜棗　　5-6 粒

果皮　　2片

做法：

1. 用清水將菜乾軟洗淨，果皮浸透去囊

2. 瘦肉洗淨汆水備用

3. 蜜棗及紅棗洗淨，紅棗記得要先去核呀!

4. 紅蘿蔔及粟米去皮切塊

5. 煲內放約2L水，然後隨水加入2片果皮

6. 待水滾後加入所有材料，先用猛火煲半小時

7. 之後轉小火煲一小時

8. 最後加鹽調味，就飲得啦~

個湯好飲之外，千萬唔好忘記啲湯料，基本上所有材料都可以食，咁就又嚟一湯兩食，啱晒我啲師奶仔呀。

其實係煲嘅過程都有好香嘅菜乾味，所以唔多唔少都有啲期待。第一啖入口又真係飲到好香嘅菜乾，而且又帶少少甜甜地嘅紅棗味，所以都唔錯。

有幾好飲睇老公表現就知，平日佢飲落都係一碗起兩碗止，有時係要強迫先肯多飲一碗。不過今次佢竟然唔覺唔覺自動自覺咁飲左四大碗，所以......又一令我滿足之湯，又係一個動力令我繼續煲多啲湯呀！