【 3次聖誕Meet & Greet】8隻比卡超Fever Dance @ Mikiki X Pikachu

比卡..比卡..比卡超！兜兜轉轉， 比卡超經過一個月時間快閃巡遊， 終於落戶Mikiki. 「哈囉！比卡超s」

「出嚟啦！比卡超！」哈哈哈！！ 一個精靈球可以變出兩隻大卡超， 著數著數！！

嘻嘻嘻！今日我又可以靜靜地集郵， 因為又撞正SY返學時間， 於是放學時我打電話給他:「你估爸爸今日去見邊個？ 黃色嘅」

SY答:「多啦美！ (我:唔啱喎...有一個精靈球嘅)， 哦！ 比卡超， 點解你又唔帶我去呀？」， 於是我立即拉開話題:「你知唔知比卡超係豬， 定係老鼠？ (囝:肥嘟嘟梗係豬啦)， 同你一樣係老鼠呀！ (老鼠？ 黃色喎...講大話)」

哎呀！ 好可憐的兩隻肥美比卡超， 塞進喵喵怪熱氣球， 有時易入難出...即等同當年讀小學， 將頭塞了入窗花， 結果要找媽媽幫手才可以推返個頭出來一樣.

同行有朋友問:「點解火箭兵團一定要捉比卡超？」對於幾百隻小精靈只識比卡超的我， 啞口無言， 不過另一朋友E答:「喵喵怪梗係要捉老鼠返去比BOSS啦！！」

(係米真架？) 朋友E:「我當年去超級無敵掌門人背150隻小精靈個名架， 我又點會呃你呀」 (吓？ 真係有人背晒的精靈名架？ 心諗:「係米傻傻哋？」)

精靈擂台， 哈力馬龍與呱呱泡蛙對戰比卡超， 及火狐狸， 突然走來真人比卡超， 嘩！ 論身形贏晒！

望住眼前的比卡超， 我忽然想起今時今日的人氣王妖怪手錶， 首94集便已經有超過180隻妖怪， 究竟又有沒有人會全部念齊他們的名字呢？ (如果有...真心驚！！)

上個月我追比卡車， 追到銅鑼灣， 今日的裝飾版卡超車， 泊好位任影特影， 不過可惜2位比卡超太肥， 不能上車...我很想和超超手拖手， 慢慢開車呵.

我從來沒有想過商場Pop-Up-Store有平玩具， 但今次竟然超筍價可以買玩具. 後面的比卡超， 水水獺搖控車各只售 $77.7， (救命！！ Yahoo拍賣最平也要$119)， 而前面的Tomica車仔更只是$28.7...(平時無40蚊都落唔到樓啦) 大出血！！ 大出血！！ 是時候啦

之於如果大家想與8隻比卡超， 藤藤蛇， 及水水獺見面， 記得看清楚日子， 因為今次有分抱抱會， 跳舞表演， 及全員大巡遊. 總知今個月聖誕節周， 差不多日日都有比卡超陪住你！！ 

Pika Fever Dance

日期：2015年12月13日、20日、25日及26日
時間：2pm 及 2:30pm

PIKA FEVER 大巡遊
日期：2015年12月13、20日、25及26日
時間：4:00pm-5:00pm

Pika抱抱會
日期：2015年12月12日、19日、27日
時間：2pm 及 4:00pm

新蒲崗Mikiki x 寵物小精靈聖誕展
日期：2015年12月5日至2016年1月3日
時間：12nn – 9pm
查詢電話：3980 9930