【食譜】韭菜花炒魷魚

韭菜花同魷魚依兩樣都係我好鐘意食嘅餸，突然忽發其想將佢地炒埋一碟。

估唔到我依個嘗試又幾成功，仲得到老公讚賞添~

材料就係一斤韭菜花同埋幾隻鮮魷魚~

世事就係咁古怪，當你挑起條根真係好想食嘅時候，你點搵都係買唔到。平時啲韭菜花間間菜檔都有，仲要係十五蚊兩扎咁。不過今日行左好多轉街市都係買唔到，到我搵到有時，都要幾十蚊斤，都真係貴都呢...…不過為食，照買啦！

做法：

1. 首先將韭菜花切走啲花芯，之後切段備用

2. 魷魚洗到白雪雪之後，將切成一片片，然後係面上鎅花

3. 將啲魷魚放入滾水出水，燙熟至捲起 (約3分鐘)備用

4. 油放入炒鍋中，蒜頭爆香後，再放入韭菜花炒半分鐘

5. 最後放進魷魚片炒多約1分鐘，最後加少少鹽調味

其實當初我都有啲擔心啲魷魚會炒過火，會令到好韌(因為之前有個不成功例子...…哈哈哈)。

不過好在今次都總算成功，啲魷魚係有煙煙韌韌嘅口感，而且仲好鮮甜添。

韭菜花亦都係另一亮點，平時我煮蠔油韭菜花老公都一定唔多點食，仲暗示過叫我冇唔好再煮。

不過今次佢都食左好多，仲話都合格啦，所以我當佢讚我啦......咁我又可以煮多啲啦......哈哈哈。