七友 （葉朗程）

資料圖片：justin bieber，網絡圖片

好多人 facebook 裏面，總有一兩個朋友，是讓人很有衝動「掟電話」的。呢啲「朋友」，其中一個特點，就係好鍾意自拍。

搞清楚，自拍有三種。

一種，係用電話嘅前置鏡頭自拍。

呢種自拍，除非你用自拍神器，否則最多只會見到你個樣或少少上半身。玩前置鏡頭自拍嘅目的，通常都係想影你身後嘅背景，或者身後一大堆朋友。呢種自拍，屬於 informative，即是最起碼都叫做畀到一啲資訊人睇。例如你去咗日本新宿，咁啱後面有間鋪頭你想拍低，你會自拍，目的係想話畀人聽你到此一遊。又例如，食完餐飯好開心，想影大合照，又冇人揸機，你會自拍，目的係留住開心時刻。

我覺得呢種自拍完全冇問題，甚至值得鼓勵。

第二種自拍，都係用前置鏡頭。

不過呢啲人唔係要影背景，唔係要拍大合照，而淨係影自己個樣。冇錯，成幅相都係你個樣。如果你本身好靚仔，呢種自拍都還 ok，起碼你真係靚仔嘛，都叫做有嘢值得畀你曬吓。不過，就算你好靚仔，呢種自拍其實都好嘔心。你想像一下：徐緣揸住部機拍自己個樣，成個畫面都係佢個樣，然後加句 Good Morning 擺上 facebook，你覺得點？徐緣已經靚仔到爆啦，呢位 marketing 專家都唔會選擇咁樣 market 自己，點解？因為呢種自拍實在是膠到冇朋友，no matter how good-looking you are。

Ok，fine，如果你真係咁靚仔，都冇你乎，你要曬靚仔咪畀你曬囉。但如果你本身髮線又高，仲要前面跌兩條「陰」落嚟，再加埋啲不知所謂嘅紅色 highlight，然後自拍一張大頭，補一句 Good morning，再擺上 facebook，老老實實，你講，你想點？Good morning？你以為自己周柏豪定 Justin Bieber？明星自拍，係對佢哋支持者嘅一種尊重，係佢哋職業所需，係一種必要宣傳。如果你不是明星，請不要這樣 good morning我，見到你副尊容，個 morning 想 good 都幾難。

第三種自拍，用後置鏡頭。吓？用後置鏡頭點樣自拍呀？好簡單，對住塊鏡便可。點解要對住塊鏡自拍？因為影塊面唔夠，自拍者想影全身。都係嗰句，你本身係明星，影囉，你本身 model 身材，影囉。但如果你係白雪公主嗰七個朋友裏面其中一個，唔該，拜托，求你，唔好虐待你嘅朋友。

睇到呢度，feel 唔 feel 到我好嬲？的確，我真係好嬲。我有個非常要好的女性朋友，當佢係親生妹一樣，而佢男朋友就係一個這樣的一個「Good morning 自拍賤精」。自拍啫，唔使話人賤呱？佢賤，當然唔係因為自拍咁簡單。

有個國際品牌拍廣告，搵咗好多位女模特兒。我「妹妹」嘅男朋友，喺呢次廣告負責執頭執尾。個廣告拍咗成日，呢位男朋友，就同咁多個模特兒自拍咗成日。同每個模特兒自拍完，就逐個問人攞電話。唔畀電話佢，就唔畀番啲相人。畀咗電話佢嗰啲，都唔會即刻畀番啲相人，而係要人哋出嚟同佢食餐飯先得。WTF？未講完。

其中一位模特兒，拍了一整天，累了，在沙發睡著了。呢位不知好歹嘅雪姑七友竟然走埋去，除低自己件外套，披咗喺呢個模特兒身上面。呢個模特兒即刻醒咗，然後見到雪姑七友個樣，見到雪姑七友件外套，見到雪姑七友嗰兩條額前嘅陰，覺得成件事好嘔心。有啲人會問，吓，咁樣唔係有風度咩？除非你肯定對方都對你有意思，否則我可以肯定話畀你聽：除外套幫女仔保暖呢個動作，只有你會覺得自己是黎明，人哋女仔會覺得好猥瑣。送你一句自創的歇後語，就是「李逸朗唱儍女」。即係點？得你自己覺得。

為什麼我會知道這麼多？世界真細小，呢位模特兒嘅男朋友，咁啱又係我朋友。當然，我朋友冇將呢位自拍人放在眼內，但我替我那位我視如親妹的好朋友感到非常不值。靚仔又好，唔靚仔又好，男人都係賤格，但勢估唔到，唔靚仔嗰啲原來仲賤格。

我們問李嘉誠先生，買唔買樓好？他老人家永遠只講四個字：量力而為。不聽誠哥言，吃虧在眼前。不量力而為的人，會輸掉一切，包括你的 reputation。