王菀之(Ivana) 再度做老闆開Pop Up Store，她由九龍區開到去銅鑼灣區一樣有不少支持者，今次她會擺檔4天，大部份以時裝、手袋為主打，她會繼續親自長駐店內，Ivana笑言準備絕版時裝及四季也合穿的時裝任君選擇！所以總有一件會揀中的。
Ivana今次已經是第五次過老闆娘癮，她說：「今次真係開倉大割愛，因為勁多衫賣，春夏秋冬衫都齊晒，因為我之後冇時間再開，我有一條絕版玫瑰花裙，好靚呀！仲有恤衫、Ｔ恤咁，其實有啲已經絕版冇得賣，另外，仲有意大利牌子羽絨；日本牌子大褸，有啲新到連價錢牌都未搣，又有少量全新男裝同埋布做的環保袋。」
為了答謝各方支持者，Ivana繼續保持一至兩折的筍價，她笑說：「有啲會係低價到免費，不過要隨心捐錢，因為有某部份商品錢既會捐畀慈善機構，有啲貨因為極度珍貴，所以會畀原價之上，咁會等待一位有心頭好既人。」她又笑說：「因為開工時間有時不定，所以要留意Ivana的FaceBook，今次擺檔會由今日19日至22，多謝大家Happy Shopping！」
地址: 香港銅鑼灣希慎道8號 裕景商業中心15樓
日期: 19/8-22/8號
時間: 12:30 - 8:30
