【老虎!你好嘢】美白咖哩 ~ 連怕辣細路都要添食

朋友推介:「銅鑼灣有間食烏冬好正， 味超濃， 仲要係咖哩嚟㗎， (不過我阿囝唔食得辣)， 你信我， 唔太辣佢一定鍾意」(係咪㗎？？)

結果半信半疑的我， 帶住阿太及阿囝走到邊寧頓街， (即係咖啡弄對面)， 因為Tiger Curry不設訂位， 晚飯時間在門外約輪候了15分鐘。 (好彩今晚唔太熱咋...)

當你一步入暗黑的食肆， 強烈的咖哩直撲入鼻， 阿囝:「咩味？？ (咖哩呀)辣唔辣㗎？？咁我食咩好呀？」(心有少少不妙)

阿太:「E度開咗年幾啦， 你都會食舊嘢嘅咩？」， 我答:「朋友推薦食白虎喎， 佢話必食㗎」於是我未看餐牌已經即時落單， 之後店員端來一大碗白菌忌廉湯...

我問店員Kitty:「E個忌廉湯就係白虎？ 」Kitty答:「烏冬同餸料係底， 你可以撈混嚟食， 面頭係薯仔忌廉打成泡嚟㗎。」

我即時用叉「攪吓攪吓」， 原來下面真的藏滿咖哩黃的烏冬， 滑嘟嘟的肥牛， 還有溫泉蛋。

原本純白色的「忌廉湯」， 由我簡簡單單左右拌勻之後， 已經漸漸由淺咖啡色， 變為堂堂正正的咖哩。

阿囝問:「食得未呀？ 我好想食烏冬喇」(心諗...你咁怕辣， 應該食一啖， 之後實扭計)

誰知這位怕辣的小朋友竟然一邊食烏冬， 一邊說辣， 一邊飲水， 之後又大口烏冬食食食...(簡直神蹟顯靈一樣呀！ 阿囝幾時變得可以食辣呢？ )

微微的咖哩辣， 其實配上特別煙煙韌韌的烏冬， 絶對是醒神， 味道又夠出， 不是賣廣告， 好味得連阿囝也添了兩碗說:「我今晚飲咗5杯水呀！」~  白虎

Wyman教陳詠謙填詞最重要是改歌名， 這裡的食物名， 全部非常到肉， 老虎吼沙律絶對是老虎吼的份量！(夠晒驚人)

酸酸甜甜， 甜甜酸酸的沙律醬(Annie鼻音重現)， 又烤雞， 又温泉蛋， 豐富之極。 (真係抵食到貢？？)

幾好餃， 真真正正有豬軟骨造餡的餃子， (有啲嘢咬吓， 起碼我都會記住， 唔會全無話點的一般煎煱貼先啦)。

超入味的野人烤肉腸， 根本不用再伴芥末醬， 我問Kitty:「條骨係咩骨嚟㗎？ 」 她答:「原裝日本連埋條骨嚟㗎」

所以見微知著， 簡簡單單一條腸， 你一定不會忘記食完野人的好味大肉腸. ~ 老虎！你好嘢。

地址：銅鑼灣邊寧頓街