爆壹爆 勝和大龍鳳插旗
新界土地利益係嚿肥豬肉，各字頭一有機會就走入新界插旗。上星期爆哥同朋友到大埔燒嘢食，去到大尾篤村嘅村口時，見到一大班古惑仔企喺度，周圍仲擺滿花牌同大堆美少女添，咁正點解唔預埋爆哥呢？
爆哥即場八卦嚇，原來係勝和插旗大埔開甜品鋪，而且老細仲係勝和現任坐館沙田 Me添，之後仲見到勝和元老雞腳黑同茶煲、另一現任坐館子騰、和義堂新話事人玉泉，同埋和合圖猛人高佬山陸續到齊。
當日除咗江湖人，仲有娛圈人俾面出席，好似喬寶寶、仙樂都同范振鋒兩公婆。江湖人開鋪頭最鍾意舞獅，夠熱鬧兼有氣勢嘛。各人點完睛後，現場即刻大鑼大鼓，三隻獅起勢咁舞，之後仲跳上個幾高嚇嘅樁，仲要喺樁上面跳來跳去，搞到下面嘅人睇到嘩鬼叫。又打鑼又舞獅，唔講仲以為係農曆新年添。新鋪開張咁重江湖味，睇嚟呢區日後又多風雲囉。
三隻醒獅起勢咁跳，睇到在場人士嘩鬼叫。
港女呻吟 紅爆網絡
網民「人妻」行為出位，竟然上載自家製呻吟聲。
依家啲女孩子開放程度，真係估佢唔到。連爆哥思想咁潮，有時上網見到啲港女網民大膽行為，都當堂嚇一跳。爆哥近日上討論區睇嘢時，就發現一個叫「人妻」嘅港女好出位，唔單只上載自己嘅相，竟然仲錄咗幾段呻吟聲擺上網。嘩，知道網民大軍都係宅男為主，所以特登潤嚇班毒男。
呢位「人妻」港女自稱二十一歲，唔單只結咗婚，仲係一名準媽媽，人妻兼人媽啱曬毒男口味。佢話自己思想開放，所以唔介意將自己嘅隱私開心「些牙」喎，仲話最緊要一班巴打開心就得。佢咁大方，一班巴打當然開心啦。個帖只係出咗幾日，就已經有一千四百幾個毒男留言，反應不知幾熱烈，好多人出力打氣，叫「人妻」錄多幾段三級錄音益街坊，話香港實在太悶， CCTVB膠劇睇到成眼都係眼屎，呢類人妻叫聲先夠本土咁話，有啲仲話只係聽聲唔夠喉，強烈要求有聲有畫面添。真係依家仲有鬼人睇電視咩，網民自製節目更精彩啦，係咪呀大佬！
呃爸媽 小朋友最 Like
