以往一年總有一兩次,拉隊跟食友到大班樓食番餐,不過呢幾年就冇再安排,一來訂位難,二來呢兩三年既晚市因疫情關係,訂完又改令人卻步,直到今年有食友來港兼主動邀約,又得靚仔食友幫忙,終於可再做一晚大班。

新舖第一次來,感覺跟舊舖係完全兩種感覺。舊舖係中式氣氛,新舖感覺像fine dining。

前菜先上二年陳桂花冰肉豆腐花,冰肉已藏在豆腐之上。

前菜之二係凍鹵水花椒小吊桶釀土魷,入口花椒香之突出比鹵水香更吸引。


最後前菜係蟛蜞膏柚皮冬瓜,蟛蜞膏其實係蟹膏,用上冬瓜同吃更突出蟛蜞膏之鮮。


一口湯見得到比平時既高湯更清更無渣,飲落亦比平時高湯更清甜也更濃郁既味道,不過完全見唔到任何湯渣感覺差一點,如果送上一碟湯渣感覺更完滿。


最吸睛既大班樓名菜雞油花雕蒸花蟹配陳村粉上檯。 

花蟹冇花冇假肉嫩鮮甜。

但陳村粉比以前厚,亦冇以前咁軟滑。

幸好雞油花雕汁仍然香濃帶酒香,所以另叫一碗白飯撈汁。

呢度既白飯米粒飽滿,入口有實實在在既米香, 感到比陳村粉更適合配雞油花雕汁。

大班樓酸辣甜蒜牛四味,酸辣口味係做得到位。

牛肚等等亦火喉十足入口軟滑。


主菜既樟木煙薰黑腳鵝非常好,黑腳鵝皮薄而脆。

肉質亦有層次入口又軟熟,樟木煙薰香亦完全融入鵝肉中,可說是今晚最好既出品。


時菜係豬油渣櫻花蝦時菜,豬油渣可能落得唔夠重手,所以時菜雖軟嫩,但冇咩豬油渣油香伴隨。

來到尾聲薑絲肥牛膶腸窩蛋煲仔飯送上。

飯粒口感只是一般,心感叫白飯更好。另飯中既肥牛係夠薄有油份,但跟煲仔飯有點格格不入,好彩當中既膶腸水準甚佳,可以挽回分數。

飯焦睇落十分對版,咬落卻不夠香脆。

甜品三味中最喜歡中間既酥餅。

餅身甚香脆又不太甜兼齒夾留香,食完可食多一件。

無比較無傷害,但到過新舖後,更懷念在舊舖的日子,不過點都好,叫做同食友完成佢最想再去既餐廳,在此多謝靚仔食友安排,也順祝食友回國後生活愉快工作順利。

 

大班樓

地址:中環威靈頓街198號The Wellington3樓

Tel : 2555 2202


 再做一晚大班 : 大班樓

 https://www.facebook.com/blackholemini