（圖片來源：Fame Focus）
喺facebook上，如果我哋想判別一個人受唔受歡迎，或者多唔多朋友，好多時都會睇佢啲posts有幾多人like，愈多人like就證明佢愈多人關注，可謂電子世代嘅另類虛榮。但有朋友就話啫，對比起嚟人哋有過百like，但自己就得單位數字，咁又可以點做呢？
日本公司Family Romance就好「貼心」地提供一種特別服務，令你嘅自信大增，唔使落後於人，而呢項服務就係畀錢買朋友同你影合照喇！睇返趨勢，facebook上最受歡迎嘅好多都係同朋友一齊開心聚會嘅相，無朋友唔緊要，有錢就解決到喇！只要你肯付出8000 yen，Family Romance就會幫你揾一個朋友，同你一齊影相同upload上facebook！
喺佢哋嘅官網上，可以見到佢哋不斷強調好多顧客用完佢哋嘅服務之後都攞到過百like，仲話唔使羨慕人哋，申請咗呢個服務之後自己都可以咁幸福！
到底社交網絡上嘅like數係咪就等如自我價值或者社交能力嘅高低呢？其實好多人喺網上都會報喜不報憂，即使睇落人哋嘅生活幾幸福美滿都好，要知道風光背後都一定有不為人知嘅辛酸！何苦比較呢，不如先做好自己啦！
（圖片來源：jin115）
