曬命是一個值得鼓勵的動作,因為曬命可以是工作動力。曬一餐飯,曬一部車,甚至乎曬一個靚絕中環的女朋友,也需要錢。既然要錢,那就得努力工作,才有命可曬。

不過曬命其實也是一門學問,不能求其,而且要做 due diligence,否則一旦曬錯命,就是賠了夫人又折兵,收視率是賺到了,但其實人哋邊看你邊偷笑,那又何苦有自唔在攞假嚟丟。

有兩個女性朋友,靚就稱唔上,但講到發姣,不相伯仲。由中學時期,她們兩個已經是表面冇乜嘢,暗地裏卻是很多牙齒印的死對頭。兩個女人經常在 facebook 單單打打,作為觀眾的我,隨時有花生食,樂事。

準備結婚的時候鬥鑽戒,兩卡半贏咗兩卡;結婚的時候比酒席,Grand Hyatt 贏咗 Conrad;結完婚之後,終於打個和,大家住埋同一個屋苑。點解今次竟然會打和?一講到住屋問題,唔係話想贏就贏,要勝人一籌,成本實在太高。佢住瓏璽,你就梗係想買層天璽騎住佢,咁但係,天璽喎,四萬蚊一呎都有,是真正考驗實力的曬命,不是隨便捱幾個月公仔麵就換得到的虛榮感。

 

兩個女人就好似一間公司嘅主席咁,佢哋永遠只會畀 directions,至於點樣去實現呢兩位主席嘅願景,當然就係兩位CEO,即係佢哋老公嘅責任。

話說,女人一號某天在 facebook 上高調展示新買的手錶,是一隻勞力士的玫瑰金女裝手錶。相中的她左手托腮,經過美圖加工之後,手錶格外閃爍。相片沒有附設任何文字,只有兩個心心圖案,然後 tag 埋佢老公。唔好以為呢啲相會冇人 like,呢個世界物以類聚,近墨者黑,女人一號有很多朋友都 like 咗呢幅相,有啲仲留埋 comment 話好羨慕佢咁幸福。實不相瞞,幅相我都有 like 到,不過唔係 like 佢隻錶,係 like 佢做人咁易滿足。「撈」而已,使唔使咁開心。

女人一號這樣一曬,女人二號又怎會示弱?兩個月後,睇嚟女人二號嘅老公已經捱完公仔麵,因為女人二號終於作出反擊。女人二號在 facebook 放了一幅名錶的照片,寫咗句「錫晒你」,又 tag 咗老公。呢隻錶嘅品牌,比女人一號嘅勞力士高幾班,屬於四大名錶之一。睇牌面,女人二號梗係贏晒,不過識錶嘅人會知道,其實佢輸咗,仲要輸得好難睇。

雖然係四大名錶,但其實係十四年前嘅錶款。即係點?即係專門店冇得賣,其他非專門店嘅錶行都唔會擺出嚟賣。當然,佢呢隻唔係二手錶,但絕對是某些錶行砸咗好多年嘅倉底貨。女人二號老公應該同錶行相熟,先至會「撲」到呢隻倉底貨返嚟。作為錶行,難得有客肯幫你啃咗隻倉底貨,折上折上折賣畀你都冇所謂啦。

買錶同買車嘅道理一樣:冇錯,四大名錶係等於賓利,但你寧願買㗎舊款賓利,定係買架全新寶馬?梗係全新寶馬啦。唔係喎,舊款賓利好 classic 喎。嗱,唔好搞錯 classic呢個字。1956 年嘅 Jaguar Roadster 係 classic古董車,2006嘅 Jaguar Roadster 就係超殘二手車。正如十年前已經出嘅錶款,今時今日仲有價有市,就叫做 classic 款;至於十年前已經出嘅錶款,折上折求人買都未必有人買嘅,就叫舊款。

女人二號呢幅相,吸引咗四十七個 likes 和六個留言。第四個留言,是女人一號寫的:「你老公真係抵錫,十幾年前嘅款都畀佢搵得番,精打細算!」

女人與女人之間的面子之爭,男人永遠是炮灰。


 錯曬(葉朗程)

 https://www.facebook.com/marcusyiphk