一個崇洋的理 – 「中華文明欠缺【邏輯學】」（明德偉杰風）

一天都光晒啦，終於證明咗中華文明文明係一潭死水，孔子唔識問問題，係個大傻閪。

係 1487 年葡國航海家 Bartolomeu Dias 繞過好望角進入印度洋之前，印度洋無海盜，阿拉伯，印度，東南亞，同中國嘅商船，都無裝炮。好合理，無海盜打劫，做乜要裝炮，貪佢輕咩？同樣，葡國航海家希望搵條財路，翹起個中間人，直接由印度買貨，都合理。但係邊個合邏輯呢，係炮都唔裝嗰個白痴，定係撞咗入印度洋嘅低能？如果你知道之後嘅歷史，可能會話無裝炮嘅商船傻，但係我睇兩個都合邏輯。因為基於佢哋當時所掌握嘅資訊，兩個都做咗個合理嘅決定。

「邏輯」一詞係翻譯自英語，中文本無此詞。如果話「中華文明欠缺『邏輯學』」，所以無科技發展，咁歐洲文明欠缺孝道，所以無人性。

邏輯，民主如果能治肚餓，雅典就唔會覆亡，希臘亦唔會財困。至於點解歐洲係十五世紀至後雄霸七海，及東方文明衰落嘅原因，實在唔可以用個「欠缺邏輯學」以偏慨全。文中所講嘅古典邏輯學，起源於雅典，原因同城邦嘅文化有關。雅典嘅政制係直接民主，所有市民都要參與。係所有男性雅典人都要投入政治嘅背景下，教育最重要嘅一環就係辯論同演說。邏輯，不但係為咗辯論，而係思考問題嘅工具。亞里士多德創造咗歐洲第一道邏輯學，戰國嘅公孫龍都有相近嘅學說。

至於邏輯學守護西方文明，實在唔係事實。古典哲學同文化嘅書籍大部都係中世紀失傳，當時識字嘅主要係神職人員，睇嘅書係聖經，好多國王都係盲字唔識多隻。當時掌握著科技嘅係巴格達。係巴格達嘅學者研究古希臘嘅書籍，改善航海科技，仲有做外科手術。歐洲當時仲係活係宗教狂熱嘅時代，對古典哲學同文化全無認知。一路直至十四世紀，先從伊斯蘭學者手上獲得失傳千幾年嘅古籍。

邏輯學，同科技無必然嘅關係，需求先至係真正原因。唔通張衡發明候風地動儀係因為亞里士多德報夢教佢邏輯學？當然唔係，地震嘅影響先係發明嘅主因。John Harrison，發明咗世上第一個能夠係海上準確報時嘅時間器，但係佢無讀過書，全靠自學。因為當時英國想要一個能夠係海上測量經度嘅辦法，而 Board of Longitude 設立咗個獎金，俾諗出呢個辦法嘅人。John Harrison嘅時間器 (H1) 能夠準確顯示出發港嘅時間，加上係船上從太陽得知本地時間，就可以知道經度，同隻船嘅準確位置。如果無呢個挑戰同獎金嘅話，John Harrison 就唔會發明 H1，與邏輯學無關。

科技嘅需求，係源於競爭同埋錢。競爭係指國際嘅競爭，錢就係錢。古今中外，帝國都係無乜國際嘅競爭，因為周邊都無乜可畏嘅對手。而帝國衰落之前都不缺錢，因為開國嘅時候可以征戰掠財，盛世就打稅。帝國要嘅係治國之術，穩定係首要，所以中國歷朝都係重農抑商，求嘅就係穩定。試想下如果明朝嘅時候發明咗個耕田機，將產量即時提升三倍，一半以上嘅農民當堂失業。試問邊個國家會發明一啲制造社會問題嘅嘢出嚟？國際競爭引發對科技嘅需求，只要睇下近幾十年嘅力使就可以。美蘇冷戰，搞衛星，火箭，登月，太空站，又軍備競賽，無咩邏輯可言，月球又無石油。

中世紀之後歐洲政府，都無乜錢，打仗都要借錢，造就咗銀行嘅興起。為咗搵多啲錢，就要去印度，買東方嘅商品。去印度就要航海技術，無嘅一係偷，一係自己研發。當然唔但止政府想要錢，私人公司都想要，所以增加咗對科技嘅需求。

至於邏輯學係咪就係真理，永遠都唔會自相矛盾呢？邏輯學只係一個審視語言嘅方法，係不同嘅假設下，可以有不同嘅結論。係同一個邏輯框架第下，Hobbes 覺得人性本惡，人要逃離 State of Nature ; 但係 Rousseau 人性本善，係 Civil Society 惹嘅禍，所以人要尋回 State of Nature 嘅本性。Kant 覺得自由可以從政治解放同政治平等中獲得；Marx 認為政治解放係唔足夠嘅，仲要宗教解放同經濟解放，人先可以真正獲得自由。邏輯學可以審視語言，但唔係法力無邊。

文明嘅發展，唔係線性嘅，無話邊個先進，邊個落後。State of Nature 同 Civil Society 比，邊個好啲？就睇你問邊個。英國街頭有人露宿，但係啲住家狗就有屋住，有專人修甲，有專人沖涼；係塔納島嘅土著村落，人人有屋住，唔乖嘅狗劏嚟食。到底邊個先進，邊個落後呢？

文化同政治嘅發展，係七國咁亂嘅時候，就係百家爭鳴嘅時候。春秋戰國係咁，文藝覆興亦一樣。羅馬後嘅歐洲，政權分散，但係宗教神權卻依然統一。教廷嘅神權，限制國君嘅王權，國與國可以打仗，但唔可以成為霸主，王可以稱帝，但要由教宗加冕。情況就如春秋，只係遲咗千幾年。風水輪流轉，你覺得你嘅世紀第國而經起晒啲奇觀嘅時候，真實世界而經到盡頭，但係百幾年後都只係一個過程，係世界某處又會有另一個春秋戰國。打機打到上晒腦，無必要寫文愚民，如果自己唔識又硬係要寫，做下資料搜集先。

作者：明德偉杰風（本文章由聚言時報授權提供）