麥明詩,圖: tvb.com

有些人可能還會收看一年一度的香港小姐競選,但就算真是看,也最多是 hea 著看。咁啱開電視,咪指吓笑吓囉,睇吓有冇「佳麗」跳跳吓舞趴街,又期待會唔會有人輸咗之後搶咗司儀個咪然後大嗌「點解我咁靚都唔選我」。不過好朋友 Benson 同我講,識睇,梗係睇「膝頭哥」。

睇前睇後,睇樣睇腳,甚至乎偏到睇腳趾,我都聽過,但鍾意玩膝頭哥,實在是聞所未聞。識你咁耐,都唔知你玩到咁偏喎,膝頭哥有咩美感?「冇美感㗎,個個膝頭哥都一樣㗎啦。」Benson 和我離開浸會醫院,邊走邊說。剛剛有朋友踢波斷腳,要留院一天。

既然冇美感,點解要睇膝頭哥?「睇膝頭哥,係要睇吓膝頭哥附近有冇瘀傷。」唔明。「十幾二十個港姐行出嚟,邊個膝頭哥有瘀,邊個就係冠軍㗎啦。」哦,我終於明佢想講乜。你哋就算唔明都好正常,因為唔正常嘅係佢,同埋我。有啲「家務」,女人會跪喺度幫男人做 。邊個肯上高層屋企,幫佢做「家務」,就係冠軍。講真,我真係唔信。就算跪喺度,都唔代表會瘀;就算瘀,都唔等於攞冠軍。亞姐可能會,港姐冇咁兒戲。

我冇咁變態,唔會睇膝頭哥。但如果要我提議一個特別環節給港姐,我一定提議「吃雞翼」。我很怕看見女人吃雞翼,因為我覺得世界上沒有一個女人可以高貴優雅地吃一隻雞翼。我講緊嘅係雞全翼,即係有雞鎚有翼尖那種,仲要係滿佈豉油汁嘅瑞士雞全翼。如果有女人可以意態撩人地吃一隻雞翼,佢一定攞到港姐冠軍。

發夢都冇諗過自己會關心邊個係香港小姐,自從中三開始,冇扭開電視睇過任何一屆。可能會因為出街打邊爐然後間房咁啱有電視所以睇到,但係肯定唔會坐定定喺屋企專登睇。但係今屆,我想講,係已經同八個朋友約好咗,會專登喺金牌火鍋開間房,集中精神睇吓最後后冠誰屬。點解今屆咁緊張?Ladies and gentlemen,in case 你未知,等咗咁多屆之後,今屆港姐,終於有女神下凡。

呢位下凡女神,叫 Louisa,中文名麥明詩。Louisa,你唔使驚,Marcus 哥哥喺度寫你,係要高度讚揚你,沒有惡意的。仲有,雖然我大你足足十年,但係我個樣其實好細個,同埋我每日都有敷 mask,keep 得好好,所以我堅持自己係哥哥,唔係叔叔。首先我想同你講,我知你乖,唔會囂,但係恐防你真係會有少少自以為是,我要提醒你:其他參選的姐姐明顯輸最少五個馬鼻,即係擺明陪跑,但「完美」都係相對嘅形容詞,冇其他人襯托你,怎顯得你如此出眾?選美過程中,謹記,你仍然要無時無刻尊重其他人,因為最少她們有體育精神陪你跑。

今屆香港小姐,因為有 Louisa,令人引頸以待。女拔萃,仲要係十優狀元,參選香港小姐?簡直係難以置信,Louisa 小妹妹,你實在唔需要多謝 TVB 畀個機會你,而係 TVB 反而應該有個高層走出嚟公開多謝你畀個機會佢哋,等佢哋呢個無厘頭電視台嘅選美節目可以同「質素」兩個字掛到勾。

女拔萃的舊生,我也認識幾個,最索嗰位,當然係我阿媽。「係唔係個個女拔都係你咁款?」我問媽。她很大反應,咩意思,我咩款呀?「好款,好似你個手袋咁好款。」阿媽的自信回來,說我也見過她的舊同學,「你話係唔係我咁款啦」。諗都諗到唔會同款,女拔有個款,但係七十年代嗰啲係一個款,廿一世紀又係一個款,女拔升港大一個款,女拔升劍橋又另一個款。如果仲要好似 Louisa 咁,劍橋法律系,無敵好款。

做女人做到女拔加劍橋,肯定唔只 Louisa 一個。一般嚟講,如果你用 X-ray 照一照呢啲女人塊面,你應該會見到個數字,yes,係個 7 字。讀書咁叻,唔係 expect 佢靚卦?Sorry,Louisa 呢位小妹妹唔只靚咁簡單。高鼻大眼細嘴咪靚囉,有幾難?In fact,「靚」呢個字,太俗,整 cheap 咗麥明詩。

麥小姐散發著那種氣質,可遇不可求。有練氣功的朋友跟我說過,有啲人嘅磁場特別令人舒服,企喺呢啲人身邊練功,功力會特飛猛進。所謂氣質,大概就是這種磁場。更具體一點說,就好像馬騮搣和白雞冠的道理。兩種都是靚茶,馬騮搣香味濃郁,好比一個有少少氣質的女人,但白雞冠那種醇厚回甘,直情是個渾身氣質的天使。睇今屆港姐,就係要睇天使下凡。

明詩,don’t worry about the chicken wings,就算你真係食到污糟邋遢冇嚟貴格,全香港由三到八十歲嘅男人,都應該會爭住幫你抹嘴。

刊於蘋果日報


 她,下凡了 葉朗程

 https://www.facebook.com/marcusyiphk