大掛檔泰菜出品 : 暹羅泰式粉麵燒烤

又係行山去左新界大西北，睇左路線之後梗係搵野食，今次就殺入屯門工業區建榮街個邊，食下大排檔風味既泰國野。

星期六既熟食大排檔冇咩人，幾張檯任坐。檯面已放定幾樣食泰國野常見既醬料。

中午餐牌主打泰式船河之類，唔知中午有冇燒烤，不過都冇諗住食咁多，都係叫兩碗野就算。

豬肉泰式船河睇色水對版。

炸豬皮香脆之外，湯頭有番咁上下色水而飲落幾夠鮮味。

河粉睇落走粗獷路線，但食落又唔錯唔係一夾就散。

豬肉片食落幾滑有肉味，重有粒豬肉丸彈牙有肉汁都係好野。

泰北清冬陰湯粉跟左金邊粉，食落幾有咬口。

半隻蛋冇咩特別，而個湯睇落幾濃郁，飲落就feel到酸香鮮夾雜在一齊，係愈飲愈開胃個隻。

粉腸洗得乾淨，食落冇腥臭味又冇渣處理得幾好。

用湯匙撈下個碗底就見到成座山咁既香料同豬肉碎，唔怪得個湯咁夠味。

食完感覺唔錯，下次過開黎都想再試下其他出品，應該有機會短期內再番兜。

暹羅泰式粉麵燒烤

地址：屯門建榮街32號建榮熟食市場地下10號舖

Tel : 2881 0786