藝人李麗珊(Lisa)上月母親節當日,在社交網站公布懷孕喜訊。現時陀B六個月的Lisa,接受香港開電視主播馬梓軒專訪分享喜悅,她更公開腹中女兒的英文名由來:「宜家就首次同大家披露!因為我同老公都好鍾意陳慧琳,所以我哋決定將BB英文名改做Kelly,至於中文名就仲諗緊!」

即將榮升靚媽咪的Lisa,提及女兒滔滔不絕,又表示BB乳名取名為「荷蘭豆」:「改呢個名係因為我老公姓何,同埋啱啱去照超聲波嗰陣,佢真係好似一粒豆,好細粒!其實最初得知懷孕,我唔係好相信,自己每個月都好緊張檢查住,後來去睇醫生真係確認有BB,自己好驚喜但心情又好複雜,覺得成件事唔係好真實!」

喜愛唱歌的Lisa笑言,雖然未知BB將來會否喜歡音樂,不過自己對唱歌的興趣,是小時候被父母感染的:「我爸爸媽媽好鍾意唱歌,記得以前我爸爸會買好多唱片,我哋一家人成日會爭咪唱歌!我小學嗰陣又會自動請纓上台表演唱兒歌,仲會做埋動作!」最後,Lisa更即席清唱自己心目中最喜愛的兒歌《生命有價》送給女兒,非常溫馨!


 李麗珊接受專訪分享陀B喜悅

 https://www.facebook.com/starshk