【UTO娛樂|超人的能量|林超榮】王子也中招

  新冠狀病毒橫掃全球,三宮相繼失守!

最先失守的是白宮,特朗普已經語無論次。然後是克宮,不過普京沒有公佈。接着白金漢宮,皇儲查理斯王子中招。

刑不上大夫,病毒何嘗不是。疫症流行,低下層勞苦階層係高危,因為日夜奔波搵食,打工仔容易中伏。

病毒無國界。新冠病毒好似乎專攻上流階層,總統夫人中招者不少,最惹人談論的是查理斯王子。據說母后驚聞病訊,都不禁問:「阿仔,你去咗邊度蒲,惹咗個新冠回來,搞到白金漢宮,人人隔離,十四日我都見唔到你。」

查理斯王子在視像電話回答:「阿媽,你想聽真話,定係聽假話?」皇儲來一個英式幽默。

「衰仔,你都病得好嚴重,仲同阿媽玩嘢,乜鬼係假話,乜嘢係真話?」

「向外公佈的是,近來我非常勤力,常常落區親善訪問,又握手,又擁抱,一時不慎感染。」

「假得來也幾大方得體。」女皇好滿意地問:「真話哩?」

「真話係,我專登中招。」王子說:「阿媽,我細聲話畀你知,中咗招,我就可以隔離十四日,我哋生於深宮,一生有幾可能夠一個人獨處,無人理我哋,老婆都唔使見,你話幾難得哩。」

伊利沙白女皇聽完,深有同感,都眼泛淚光。「阿仔,我可不可以跟你擁抱,你感染埋我。」可惜兩人隔着視像電話,雖然相距咫尺,有若千里。母子只能牛衣對泣。

林超榮

 

#林超榮 #超人的能量 #UTO娛樂 #查里斯王子 #英女皇


 UTO娛樂|超人的能量 | 林超榮: 王子也中招

 https://www.facebook.com/starshk