念舊慳妹顏卓靈 水樽用足十幾年

顏卓靈早前於朗豪坊商場出席一個環保活動時，被大會主持港台DJ白原顥（小白）問及平時會唔會自備水樽出街，顏卓靈即場喺坐位攞番個自己個水樽。佢話：「呢個水樽我用左好多年，個樽蓋之前爛左，我就配另一樽蓋俾佢，所以個水樽同樽蓋係唔同顏色嘅，我覺得因為爛左個樽蓋而要掉左個水樽，好嘥同唔環保！」另外，佢亦同小白分享護膚秘訣，就係多飲暖水，帶水樽就可以隨時飲到暖水；顏卓靈又話自己出街要帶好多水，有成1至1.5公升。