彌敦道馬路冒險執被輾貓屍　讓貓貓有尊嚴離去

We Oops配圖，與當事貓貓無關

【動物專訊】8月19日星期日早上，太子彌敦道如常車來車往，陳小姐看到有堆人在圍觀和拍照，原來馬路上有隻被輾爛的貓屍，不知道被多少架車輾過了。人們在圍觀，在談論，卻沒有一個人想過讓貓貓有尊嚴地離開，陳小姐不想貓屍再被踐踏，急忙借了幾個膠袋便冒險走出馬路執拾貓屍，過程中圍觀的人只在說「這樣都執？」、「由得他啦」。她坦言希望更多人會尊重生命，不要只做拍照圍觀的旁觀者。

陳小姐本身做了十多年動物相關職業，包括寵物美容、動物訓練，現在則為獸醫診所護士，亦有養狗狗。

她對本報說：「當時大約早上11時，我走到近聯合廣場附近，見到有四五個人在看什麼，原來馬路上有個被車輾到爛溶溶的貓屍，我見他們影相圍觀，還在說那是貓來的，還以為是老鼠之類。」

那貓貓顯然已經被多架車輾過，她亦目擊有兩架車輾過貓屍，她實在看不下去，走到一間衫舖借了幾個膠袋，便走出馬路冒險去執貓屍，「當時有十幾個人圍觀，但沒有人來幫手，只在旁說這樣都執？由得他啦。」

在彌敦道馬路執貓屍很危險，但她不忍看到貓屍再被車輾下去。她希望大家也會尊重動物的生命，不要只是圍觀影相，至少讓貓貓走得有尊嚴。

她在We Oops專頁中寫了一段文字分享了這故事：

「We Oops…一相一故事
*話說一個如常嘅星期日，一個如常嘅早上，
彌敦道如常嘅繁忙，行人如常急促的腳步，
大家如常地討論， 大家如常地拿起電話拍照，
討論著面前呢條屍體到底是什麼？？？
响我面前嘅並不是雀，並不是老鼠，係貓。

佢畀車輾得爛溶溶， 彷如一塊爛布，
血肉模糊嘅骨頭，內臟四溢，已經冇辦法去
分辨出眼耳口鼻，佢對我嚟講係一個生命。

老實說，當其時嘅我都考慮咗五秒，
去唔去收拾呢條屍體，因為太核突，太血腥。
但係我既不忍心，唔想去再一次俾任何人，
當係一個景點咁去拍攝，更接受唔到佢再比
任何一架風馳電掣嘅車，再輾過一次。
我決定硬住頭皮，去尊重佢。

轉身去問一間時裝店嘅老闆攞咗兩個膠袋，
穿喺隻手上面，我勇敢咁踎咗喺彌敦道嘅馬路，
冒住畀車撞嘅危險，我伸出雙手去抱起佢。
抱起一隻，曾經軟綿綿熱哄哄嘅身體。

喺嗰一刻佢只係剩低嗰一副爛溶溶嘅腸臟
支離破碎嘅骨頭，嗰一塊瘦弱嘅皮薄過紙巾，
喺我手裏面唔足1kg嘅佢，應該可以安息，
我忍唔住……我喊咗!!

喺我身後面嘅係有超過十部手提電話,
拍住我喺度做緊啲乜, 但係唔緊要,
我覺得做人嘅底線係
“做你應該要做嘅事情,做你應該認為對的事情”

貓貓，我不能為你做更多，
我亦相信車死你嘅人佢絕對係冇心。
但係可能你離開呢一個冷酷無情嘅世界，
你會比較容易再生存。

我冇辦法去評論其他所有人，
點解可以咁冷酷無情？？
我冇辦法評論其他所有人，
你哋點解揸住部手機都唔令佢有尊嚴咁死去？？
但係我只係好想問，
如果呢一個係一個老人家，
呢一個係一個小朋友，
呢一個係你屋企人或者朋友……
你哋仲會攞住個手機淨係去影低擺上網分享,
點解要選擇做鍵盤戰士，
而唔為呢個社會真真切切去，
做一啲有人性嘅事情？？
Oops…我，唔明白。

*PS: 我冇辦法係當其時嗰一刻再去影低佢嘅屍體 因為我覺得極其唔尊重,我只能夠借相敬貓，
用其他貓貓嘅相去尊重你，尊重一條生命。
貓貓一路好走*安息*」