如果你喺bar或者club度飲酒,睇中咗個目標,咁可以點做呢?你可以有好多方法接近佢或打開話題,但如果表現得太誇張,隨時會嚇親對方,甚至被人笑到面黃,以後都唔使再去同一個場玩。

以下就係收集完唔同女性嘅意見後綜合出嚟嘅10個建議。如果發現平時喺酒吧同異性無進一步嘅發展,好可能就係踩中地雷啦!

1 唔好緊盯住其他人


唔好好似找尋獵物咁掃視成個場,應該保持微笑、輕輕望下周圍,畀人處於輕鬆嘅狀態,唔係嚟「獵食」。

2 為目標買一杯嘢飲

就算買都要買得啱,唔好亂咁買,可以問吓bartender對方飲緊乜,再送多一杯。

3 買埋畀對方嘅朋友

咁做其實非常高明,可以喺對方嘅朋友面前留下好印象,自然就會幫你講多啲好說話啦。

4 為對方點一首歌

覺得買杯酒或飲品畀對方太common嘅話,可以幫對方點一首歌,咁做一定會令佢覺得你好有心思同浪漫!

5 唔好期望之後有咩回報

唔好覺得人哋飲完你杯嘢就等如應承你有後續發展,如果你會咁諗,就證明你份人好小家!

6 讚人都要小心

留意你嘅讚賞唔好令人有唔舒服,甚至係性暗示嘅感覺,否則對方隨時即刻想調頭走!

7 表現得正常啲

唔使諗住點做可以令人印象深刻,其實你正正常常地打聲招呼、介紹自己,好似同朋友咁照常傾吓偈,畀人嘅感覺反而更好。

8 唔好chur住人哋

其實你畀人愈大壓逼感,對方只會愈想走開。好多時女人都係鍾意帶啲神秘感嘅男性,所以記住唔好咁心急!

9 唔需要太刻意表現自己好幽默

除咗好笑嘅嘢之外,你哋仲可以有好多話題可以傾,好似間bar嘅環境同服務、政治、運動等等,唔需要刻意造作,自然啲先最吸引人。

10 拒絕就係拒絕

千奇唔好死纏爛打,或者以為對方係同你玩緊心理戰。記住一但對方拒絕,就由得佢啦,畀啲風度出嚟!

(圖片來源:tumblr)