今年大少爺生日連環慶祝四日,今日終於停下來。

我好重視身邊人、朋友生日,總覺得點都要慶祝一番。

呢16年來每年都陪大少爺慶祝,但包包出世後慶祝節目都圍繞住佢。

我問大少爺今年生日想去邊,佢答我:去迪士尼酒店,要住一定住新一間。

我上網睇價錢,新開間探索家酒店屬於中價,平日晚$2400包早餐,咁我就BOOK啦。

臭包早兩日知道去迪士尼酒店好開心,不停提住,等大少爺放工大約6PM先入到去,酒店設計各樣都唔錯,服務人員都好好。

房間比想像細,我之前住過迪士尼樂園酒店,好多細節位都帶點驚喜。

但呢間就工實啲,但我好唔慣洗手盤係開放式,浴室好細。

以迪士尼園區來講 $2400都唔算貴的,但假日就$3680咁上下。

樓下無乜設施,包包不停跑草地都好開心。

晚餐晌酒店內芊彩餐廳食。

講真……咁多年我對迪士尼無論樂園或酒店內餐廳都不帶期望。

但呢間餐廳算唔錯,唔知因為新酒店特別做好啲定點,希望KEEP得到。

臭包個兒童餐。

大少爺個五花肉餐,有個青咖哩的,味道不錯

我的 duck confit sandwich,佢個鴨比較淡味,但中間酸洋蔥完全可以彌補不足。

rocket係撈過先夾入三文治中,麵包質感都好。

整體不錯,三份食物 $4xx算合理。

如果唔想去餐廳,有快餐的,快餐有三文治、飯同蛋糕。

請臭包食雪糕。

睡醒一家落樓下比臭包曬下太陽然後早餐,包了兩位成人自助早餐,臭包夠 3歲就$178+10%。

食物總類多,中、西式俱備。

中式仲有點心蝦餃、燒賣及蒸飯,當然仲有炒粉麵。

呢個waffles好食。

包包在minnie懷中。

其實我12號要入迪士尼大街餐廳做tasting,有三張入場券所以當然入埋去玩。

我成個blog有超過十次八次迪士尼相片,今次只放春日巡遊上blog。

好靚好靚好靚,見到好開心。

買了呢個刻名水樽比臭包。

今次只玩了下個下午,5點幾就走,臭包一上車就…ZzzzZzzz

5月13日大少爺正日生日。

早一個月屋苑會所預告舉辦參觀消防及救護學院,大少爺話生日就參加呢個活動。

當然因為包包好鍾意消防車同救護車所以去參觀啦,就係咁下午就去參觀了

臭包最開心。

介紹了消防不少歷史仲有不同型號消防車。

還有消防同救護學院呢,之後就去晚飯,普普通通過了大少爺生日……

好戲在後頭:

5月14日,大少爺生日翌日

返完教會我同大少爺無無聊聊出TST,其實安排班朋友上我家佈置,當去完街大少爺打開門就見到朋友們唱生日歌仲有生日蛋糕。

多謝朋友們通力合作,當日開開心心食埋晚餐。

我人生就只係希望大少爺同臭包快樂,能夠做的我都會做。

大少爺,生日快樂!


 【消閒】大少爺生日,住迪士尼酒店!

 https://www.facebook.com/taisiu9