不論中西思想,現今社會都絕對唔會質疑一夫一妻制係咪一個適合嘅制度,因為忠貞嘅婚姻可以話同聖經嘅十誡一樣,係唔應該違反嘅。如果有人犯禁,尤其係名人,更會被視為係黑材料,一但公開就會受社會唾罵。

但原來到頭嚟一夫一妻制係錯嘅?科學家花咗好長時間研究一夫一妻制同多重伴侶關係邊個比較優勝,但一直都得唔到結論。

由《心理科學透視》期刊(Perspectives on Psychological Science)刊登嘅一項調查就為呢個問題作出解釋:因為價值觀上帶有前設,所以一夫一妻制嘅研究結果好有可能出錯。

美國密歇根大學嘅研究學者指,絕大部份人都對一夫一妻制毫無懷疑,甚至唔會有機會諗到底係啱唔啱,因為我哋已經認定咗呢個係唯一嘅做法。以往嘅研究對多重伴侶關係嘅用字並唔中肯,例如受訪者會被問到對「背叛」、「出軌」、「不忠」等嘅睇法。而用字不當變相會引導受訪者,影響研究結果。

美國密歇根大學嘅最新研究就指,多重伴侶制一樣可以好似一夫一妻咁咁成功。研究訪問咗超過2000位年過25歲嘅人,當中617個都身處喺有共識嘅非單一伴侶嘅關係。而經過一系列指標,例如「妒忌感」、「熱情」、「信任」、「整體滿足感」嘅評估後,發現多重伴侶關係與單一伴侶關係同樣可以運作得好好。

無論讀者認唔認同呢項研究結果都好,教授所指出以往研究嘅盲點的確值得深思,但我哋係咪真係可以擺脫對一夫一妻制嘅既有睇法呢?

(圖片來源:cloudpix、tumblr)