時裝潮流有沒有指標?Ralph Lauren 暗示沒有,the moment you become in fashion is when you become out of fashion ,這位美國時裝巨頭說過類似的話。但每年每季每月都總會有些潮流教主從荔枝角的寓所跑出來中環的連卡佛說,今個秋天興咩色、嚟緊冬天又要著咩衫襯咩褲,聽佢哋講到似層層,Ralph Lauren 說過的話又很快被拋諸腦後。

幸好我的 fashion 沒有需要跟著這些潮流的風向轉來轉去。

因為一年裏面超過二百日我都要著西裝。

如果上班一族的西裝是一種 fashion 的話,我勸你唔好跟得太入,因為後果可以很嚴重。

你想像唔到一個人對西裝要講究起嚟,係可以幾咁冇譜。

我以前都會買 G2000,覺得呃得吓人。

但,

當你的工作是開始要實實在在地坐在一個有錢人面前去說服他為什麼要指定找你拿一筆八億貸款而唔係搵其他人嘅時候,你就會知道你著緊嘅西裝係可以幫你慳到好多功夫。

當你試過坐喺人哋五十二樓咁高嘅 office 望住人哋嗰套一睇就知高你套 G2000 好多班嘅西裝原來係可以令你緊張到臀部流汗流到成條底褲都濕埋嘅滋味,你就會知道一套 more than decent 嘅西裝係一個 must。

留過一臀汗,著了一團火,嗱嗱淋買咗兩套 Hugo Boss,仍然 keep 住兩三套 G2000。

今時今日,唔好話 G2000 嗰幾套,連 Hugo Boss 也不知所蹤。

西裝,要著一定著度身訂造,雖然,兩種人仍然會走入名店 off the rack 咁買西裝。

一,著套西裝純粹係去銅鑼灣 Crowne Plaza 頂樓兜個圈飲杯嘢嗰種,yes,off-the-rack is only good enough for Crowne Plaza。

二,大陸人,不解釋。

如果 off-the-rack 唔好,咁 made-to-measure 係唔係好啲?

係好少少,不過。

曾經有品牌找我宣傳他們的 made-to-measure 西裝系列,sorry,唔會做。

著西裝係要度身訂造,即係 bespoke,唔係 made-to-measure。

如果連 bespoke 同 made-to-measure 嘅分別都唔知,你都唔需要睇落去。總之記住,唔要 made-to-measure,係要 bespoke,即係要搵個裁縫。

好的裁縫到哪裏找?問朋友,or just google it,我唔敢亂介紹。

唔係我唔識好嘅裁縫,而係有三種行業唔可以隨便介紹人,namely 中醫、髮型師、裁縫。兩劑藥醫好我嘅中醫,可能醫極都醫唔好你;剪得我似劉德華嘅髮型師,唔代表可以將你變成梁朝偉。

沒有最好,只有最夾,兩個字講晒,緣份,裁縫亦都一樣。

至於西裝。

係要啱身,唔係緊身。

有些人弄不清「啱身」和「緊身」的分別,以為越貼身越有型。「緊身」唔會舒服,除非你著住套西裝企喺度唔郁,但鬆身更萬萬不可,因為令人連望都唔想望,所以最緊要啱身。

緊身係 for 登台,鬆身係 for 癡呆,啱身係 for 人材。

咁點先為之一套好西裝?

千祈唔好信我,因為我唔係健康指標,係病態指標。孔子說三十而立,但我的價值觀從三十開始一直走下坡,一講到西裝更加,情況更加惡劣。從雜誌看到某些明星,會說他們冇咁大個頭學人帶咁大頂帽,人哋上市公司主席買超級跑車你又學人買超級跑車,一睇就知係想埋堆。其實人哋唔係想埋堆,係真係畀人傳染咗,對超級跑車著咗魔,正如我學豪商巨賈買西裝一樣。

著西裝著到某個境界,唔係求其噏兩個所謂外國西裝品牌就叫識嘢。你試吓走去問羅康瑞,睇吓佢知唔知英國意大利有咩出名嘅裁縫?肯定唔知,because he does not care and does not need to care。點解要攞羅康瑞做 benchmark?唔使解釋喎,做生意學李嘉誠,著西裝學羅康瑞,定律嚟㗎嘛。

穿西裝的最病態一群,在辦公室會議房香港紐約五星酒店六星餐廳爭研鬥麗,比拼的不僅是最基本的剪裁和布料,而是數字。有啲人覺得用 Thomas Mason 嘅布造件恤衫已經好巴閉,但千六蚊一件恤衫有好多人仍然睇唔上眼,佢哋要 Alumo 嘅布、Caccioppoli 嘅布、Monti 嘅布、三千五蚊、四千四蚊、七千二蚊,即係用cashmere 造件恤衫。除咗價錢仲有咩數字?針數。你用 Piana 布我又用 Piana 布,你用幾多針,120 針 150 針 200 針。你件西裝幾多成人手造幾多成係就咁車上去?反開個西裝領睇睇,妖,原來車上去,睇吓我嗰件,一吓兩吓三吓五十吓慢慢縫上去。

夠唔夠刁鑽?未算,你又要喺呢個位墊啲馬毛,佢又要喺嗰個位整個細細哋嘅暗袋,專擺避孕套。

返樸歸真,唔使吓吓都用最高級嘅。中環 Galleria 有好嘅裁縫,北角國都都有好嘅裁縫。

要試吓佢係唔係一個好裁縫,你可以試吓問佢:「我想喺個恤衫領入面車啲花紋,最好colorful 啲,冇咁寡嘛。」如果佢即刻攞一堆花紋畀你揀,你可以話你肚痛,要走先。白恤衫就係白恤衫,整啲花紋上去就係代表你對件恤衫嘅質地冇信心,要搵啲搶眼嘅嘢 divert 人哋 attention。就算裁縫真係有花紋畀你揀,佢都唔應該攞出嚟畀你揀。

Sale-si 定公子,唔使睇出世紙,睇恤衫領就知。


 裝身 & 裝神

 https://www.facebook.com/marcusyiphk