大家都知道美國安檢特別嚴謹,務求要將你每一件物品都檢查得清清楚楚。除咗負責機場安檢之外,原來美國運輸安全局(TSA)仲同大家玩埋instagram,不時上載喺手提行李安檢中檢獲嘅大大小小、新奇有趣嘅物品,仲用輕鬆嘅語調同你講解點解呢件物品唔帶得上機,真係好笑得嚟又學到嘢。

以下就係筆者同大家精選出嚟嘅12樣物品,真係估唔到啲人到底用佢哋嚟做咩啊!

1. 飛刀

喺飛機上面用佢嚟玩小李飛刀,定係隨機揾個乘客頂住個蘋果做刀靶?新奇有趣得嚟仲帶有幾分寒意!

2. 球棒

見到繞住球棒嘅鐵絲,上面仲帶有啲血跡添,會唔會係殺人兇器?!唔使驚住,TSA解釋話果啲鐵絲只係用橡膠整嘅,而血跡估計都係假嘅(希望啦),但記住球棒都係唔可以帶上機㗎!

3. 子彈造型面具

咦,呢個面具整得好靚喎……(重點誤)其實TSA係容許乘客帶防毒面具上機嘅,但任何子彈或子彈造型嘅嘢都係一律禁止!

4. 自殺式炸彈背心

嘩!見到呢件背心真係心都離一離!但唔係啩,想發動恐襲竟然就咁handcarry整件炸彈背心,應該話係大膽定蠢啊?原來安檢職員問返個乘客先知係一場誤會,呢件只係用嚟玩生存遊戲嘅道具嚟咋!

5. 帶刀鐵蓮花

鐵蓮花平時都已被列為攻勢性武器,呢個仲要有埋刀添,唔使問都知唔可以handcarry啦!

6. 帶刀皮帶

就咁睇左邊幅圖,望落係咪好似只係一條普通皮帶呢?原來皮帶扣暗藏兇器!只要抆個扣出嚟,就變成一把尖銳無比嘅刀!設計上嚟講的確好聰明,但就唔使止意可以逃過TSA嘅安檢喇。

7. 刀片調教鞭

唔知大家有無見過由散開一條條嘅皮條組成嘅皮鞭呢?呢樣除咗係以前主人用嚟調教奴隸嘅工具,時至今日亦成為一種性玩具(適合有特別需要嘅人士啦)。但用刀片整成嘅調教鞭……佢嘅實際用途到底係咩呢?諗唔明。

8. PIZZA

你無睇錯,真係大大個原盒PIZZA帶上機啊!你以為佢要喺過關口之前食晒佢?錯晒喇,原來PIZZA係帶得上機㗎!咁其實……咪唔使食飛機餐囉(又重點誤)。

9. 貓型鐵蓮花

呢個貓貓造型嘅鎖匙扣好可愛喎,點解唔帶得上機?原來可愛造型嘅背後唔係咁簡單,事實上佢都係一個鐵蓮花嚟㗎!

10. 手槍造型高踭鞋
咦,呢對高踭鞋個造型都相當特別,會唔會好似《國產凌凌柒》入面嘅劇情咁,佢哋其實係一個風筒嚟呢?但唔理你對鞋係咩用途都好,凡係造型似手槍(或者直情係手槍)嘅物件都係唔可以帶上機㗎!

11. 喪屍道具

上機帶喪屍?再次個心都離一離,但而家唔係睇緊屍殺列車喎。原來呢具喪屍來頭唔細,係電影《德州電鋸殺人狂》入面嘅道具,仲成具屍咁放上去照X光添,場面相當搞笑。

12. 火箭彈

真係唔好玩啦大哥,安檢果陣見到呢樣嘢真係會嚇到全機場進入緊張狀態,即刻call齊爆炸品處理組同航警嚟檢查同戒備。真嘅固然超級大件事,但假嘅話都拖累全機場嘅人嚇餐死同陪你delay,你真係好意思咩?

(圖片來源: NBC NEWS、Instagram@TSA)