就算經歷過戀愛嘅多次失敗,好多女仔都仲係諗唔明原因喺邊度,其實問題好可能係係佢哋由一開始就揀錯對象!有時候我哋都只係睇到希望伴侶擁有嘅條件,而忽略自己真正需要嘅特質,到頭來其實佢哋根本就唔適合自己,更加唔好講一齊建構未來。

揀好老公嘅條件未必關錢財權勢,或買咗樓未同有無揸靚車事,到底造就另一半成為好老公嘅10項條件係咩呢?

1.佢識得欣賞你嘅優點,同時接受你嘅缺點

無人係完美嘅,我哋唔需要刻意隱藏真正嘅自己去成為另一半嘅「理想對象」。當你揾到一個人係令你好舒服自在地表現自己,想做乜就做乜,咁樣你就會同另一半感到前所未有咁靠近同親密。

2. 當你需要佢嘅時候,佢一定會出現同陪喺你身邊

一個男人如果喺你需要嘅時候,無論發生乜事,就算佢原本唔得閒或者唔方便都好,佢都願意出現、陪喺你身邊支持你,咁就係適合陪你走一世嘅路、經歷高低跌蕩嘅好老公人選。

3. 做大大小小嘅決定時都考慮到你嘅感受

一段關係真正需要嘅係扶持同行,唔係邊個比邊個凌駕。一個男人如果想同你一齊建立未來嘅家,就會尊重同重視你嘅意見,唔會當自己係世界嘅中心,只係容納你喺佢嘅美好世界入面。

4. 願意為咗你改進自己嘅缺點

好男人遇到問題,或者係當自己嘅性格、缺點令另一半唔舒服或有不滿嘅時候,佢哋都願意正視同改進,唔會只係同你講佢係咁就咁,要你勉強接受,你唔接受嘅話仲反而怪返你轉頭。

5. 擁有共同嘅信念與價值觀

如果你有諗過同男朋友結婚,就要問吓自己你哋係咪有著一樣嘅信念同價值觀。就算喺信仰、生活習慣、生唔生小朋友等問題上嘅睇法唔係全部一致,你都要確定你哋係會互相尊重對方,願意一齊為未來努力,搵個兩個人都覺得舒服嘅解決方法。

6. 佢將你視作生命嘅另一半

兩個人喺埋一齊,對方如果會將你視作係佢對等嘅另一半,認定你係佢最好嘅伴侶,能夠陪佢一齊成長、畀佢意見、撫平佢嘅情緒。佢會尊重同欣賞你嘅一切,包括你嘅睇法、目標、價值觀、工作等等。

7. 佢願意努力經營呢段關係

當遇到問題時,佢會設法諗辦法去解決,想更加努力令自己成為更好嘅伴侶。
但要留意嘅係,每人對「努力」嘅定義同睇法都唔同,或者佢覺得投入更多時間喺工作上可以畀你更好嘅生活,但你就希望佢可以陪你多啲,呢個時候最重要嘅就係好好了解雙方嘅諗法。

8. 你哋能夠好好溝通

當你揾到真正適合你嘅人,你就唔會驚講到某啲敏感話題會破壞你哋之間嘅關係,因為你知道對方會尊重同重視你講嘅野。

每段關係都一定會遇到難關、爭吵,或者其中一個令對方傷心難過,但只要好好溝通、講出自己嘅諗法,加深雙方嘅了解,你哋嘅關係就會昇華。

9. 佢係可以信賴嘅人

同佢相處你會覺得好放心、好有安全感,你唔會怕坦白講出自己嘅諗法,亦相信對方唔會做出對唔住自己嘅事,或者突如其來地離開自己。佢唔會令你無時無刻都糾纏喺懷疑同不安之中,因為你深深知道佢有幾重視你,絕對唔會想傷害你。

10. 佢願意同你結婚

最後,就算對方做齊上面9點都好,要成為一個完美好老公,最重要嘅當然係肯娶你啦!如果你需要嘅係一生嘅承諾,好希望建立一個家庭,但佢本身唔打算結婚,或總係話未準備好同你踏入人生另一個階段嘅話,你就要好好考慮到底繼續定係中止呢段關係喇。

(圖片來源:tumblr、zbctv)