外國有唔少嘅交友網站,例如SeekingArrangement.com,係專為男女雙方找尋唔同嘅「sugar 伴侶」,亦有交流會專為一眾sugar babies聯繫同互相取經,甚至有最具代表性嘅sugar baby 做網站嘅代言人,對外講呢種關係唔只係為錢咁簡單。

Seeking Arrangement 喺2006年成立,係其中一個最著名嘅「sugar」交友網站,至今已經累積超過550萬會員,當中超過400萬係sugar babies,反映呢種各取所需嘅約會模式其實相當有系統同規模。如果你事業有成,想揾個又後生又靚嘅女人做伴,而且願意豪使喺高消費娛樂同奢侈品上,呢種交友網可能啱你。但要留意嘅係,要加入呢個網做sugar daddy,你嘅平均年薪起碼要有22萬英磅(約208萬港元)。

雖然呢種交友網嘅會員眾多,主流嘅道德標準仍然對佢相當排斥,亦會睇低做sugar babies嘅女人。好似Daily Mail就出過頭條,公開責難呢種係可恥同丟架嘅行為,而普遍人亦會為sugar babies貼上「淘金者」嘅標籤,諷刺同侮辱佢哋只係用美色同身體交換有錢男人同奢華生活。但到底呢種現代「甜蜜關係」實際上係點樣運作嘅呢?

溺愛

Seeking Arrangement 嘅代言人Brook接受訪問時話佢覺得一段「甜蜜關係」同普通嘅情侶關係之間嘅分別只係「溺愛」。佢覺得接受男人嘅「溺愛」並無問題,佢完全尊重一個權勢、財富都凌駕喺自己之上嘅男人。Brook亦話自己正正需要一個寵愛佢,喺所有花費上都為佢付出嘅人。

各取所需

其實「甜蜜關係」唔一定規限喺年長男人同後生女人嘅組合,粗略估計交友網上每8個sugar babies當中就有1個係男人(當中有直有基),同時每3個sugar daddies中就有1個係sugar mama。Brook指有啲sugar daddies嘅加入唔係為咗性,佢哋嘅年紀比較大,甚至已經無咗性能力;亦指有啲已婚男人加入係因為老婆唔願意聽佢哋每日嘅埋怨,所以想有一個又靚又後生嘅女人好好聆聽同安慰佢哋。

而Laura,一個21歲嘅網站會員就由本來連屋都無得住嘅困境,識到幾個30幾歲、同佢有共同興趣嘅男人。重點係,呢啲男人每個月都會畀500英磅(約4750港元)嘅「零用錢」佢,作為同佢擁有一段公開關係嘅條件。Laura指同呢啲男人係好自然地發生性關係,佢哋唔係用錢去交換性愛,畀錢佢使只係因為佢哋拍緊拖,亦係對方愛錫自己嘅表現。雖然呢幾段關係都只係維持咗6-7個月,但Laura都相當滿意呢幾次嘅經驗,而且會繼續尋找呢種「甜蜜關係」。

無可否認嘅係,除咗以上嘅「光明」景象,亦有對立嘅黑暗面。好似一位澳洲嘅失婚模特兒CJ因為被前夫呃晒所有錢,環境相當艱難。之後佢喺網上識到一位伊拉克男人聲稱只要CJ肯陪佢兩晚,就會畀佢6000英磅(約57000港元)。CJ千里迢迢飛到去伊拉克,仲陪呢個男人瞓咗兩晚,但最後咩都得唔到。

Sugar Daddies嘅角色

雖然有潛在的危險,但無可否認嘅係sugar babies都深深被富裕嘅生活模式所吸引,但比較少人探討嘅sugar daddies呢?佢哋投入呢種關係又期望得到啲咩呢?

另一個受訪者,30歲嘅Mark,年齡比平均嘅sugar daddies後生10歲,佢指佢好享受同又靚又吸引嘅年輕女性一齊,又話唔會乜嘢都為sugar babies畀錢,佢希望為有野心、有理想嘅女性達成目的,例如係有人會想繼續學業,佢絕對樂意資助。佢話自己唔會為使幾多錢定一個限額,佢比較重視嘅係花費嘅情境同目的。Mark指大致上佢都對發展呢種「甜蜜關係」感到正面,認為大家都講明自己需要啲乜,當中並無誤解,係呢種約會模式成功嘅關鍵。

現代愛情模式

總括嚟講,呢種「甜蜜關係」可以話係既現代,同時亦好老舊嘅一種拍拖模式。

一方面,非主流嘅同性戀、多角戀等因為交友網站而變得普遍,大家有更多機會找尋適合嘅對象。另一方面,sugar daddies與sugar babies兩者就重新展現出男女間凌駕與服從、供給與接收嘅關係。女性渴望被男性嘅權利與財富庇護,男性追求女性嘅美色與青春,一切換上現代嘅場景,但古老、過時嘅思想模式依舊。

揭開呢種「甜蜜關係」嘅神秘面紗後,或者我哋都需要重新思考男女喺現今社會嘅角色,讀者們又有咩想法呢?