【食譜】賣相超美、很有聖誕氣氛！日式煎雞聖誕樹

我覺得自己係爸爸嘅翻版，佢係一個好瘋狂嘅人，吃喝玩樂扮靚佢樣樣都做，只要佢覺得開心就會去做。

人最重要開心，得快樂時且快樂！所以我都係一個瘋狂嘅媽咪，希望包包開開心心咁過日子。

好了解包包嘅口味，講真……我都知蒸蒸蒸係最好，但日日都係蒸蒸蒸我煮嘅都悶。

所以有時我會煮得特別或者香口啲嘅比佢食，一星期一次開心下都唔係好過份，佢食得開心我就開心。

佢會好記得自己喜歡嘅食物，包包會同我講：媽咪我想食蝦、意粉，我就會知佢記得白汁蝦意粉。

若果佢講：三文魚、醬醬！我就知佢想食煎三文魚配小小沙律醬，所以唔好以為小朋友唔識就獨孤一味呢！

12月係好瘋狂嘅月份，朋友們不停為我慶生日，加上聖誕節、做冬、年尾要完成嘅工作我都係忙著，所以能夠有時間嘅話，我必定煮啲兩父子喜歡嘅食物。

今晚一家人去街，下午就整呢個日式煎雞聖誕樹比包包做午餐，呢個瘋狂嘅午餐係有菜有紅蘿蔔有番茄，個雞肉係用日式嘅做法去煎到表面脆脆地。

包包好開心，佢又讚：媽咪，你煮得好好，每當佢見到啲食物賣相靚就會讚我呢～

醃料裡面我用兩粒蒜頭磨蓉，因為包包有少少鼻水，我會喺食物中加蒜頭比佢增加抵抗力，大少爺鼻敏感翻發時我都係會用蒜頭煮餸比佢食。

烚定西蘭花同紅蘿蔔再切定車厘茄做裝飾。

醃料：

雞扒    2件

醬油/生抽   少許(份量剛夠撈勻d雞便可以)

味醂    半湯匙(比包包食既話我唔會加，但加了好食d)

糖   1茶匙

鹽   少許

黑胡椒   少許

蒜頭   1-2粒(磨蓉)

另備：

低筋麵粉  3湯匙、

片粟粉或生粉  2湯匙

做法：

1. 我用有機雞扒去皮起肉，去皮盡量去有d黏到好實我就由得佢再切件，將所有醃料加入雞中撈勻醃30分鐘

2. 醃好後就加入低粉及生粉撈勻，然後就煎(油要多少少)

3. 要熱鑊熱油放雞肉去煎封表面再用中火去煎至微金黃色

4. 轉大火逼出油份及雞肉轉為金黃色便可以

5. 將雞肉放上菜上唧沙律醬，再放上裝飾便完成