啱啱先走左個莎莉嘉令天氣稍為放晴,轉個頭海馬又就嚟打到,仲令好多人猜測聽日就會掛8號波,似乎來勢洶洶咁!雖然未到颱風嚟到嘅一刻,大家都唔知情況會有幾惡劣,但人總係會有FF嘅時刻,就比大家期待一下星期五掛8號唔使番工番學嘅日子都好丫!

打風放假咁得閒可以做咁多野,你最想做嘅究竟係以下邊一樣呢?

1.睇戲

如果係辦公時間先掛8號,大家都擺明差唔多時候走人,朋友實多左最少兩三個鐘空閒。橫掂番工大家都出左嚟洛,不如就直接約出嚟睇埋戲先走啦!

2.打機

如果你本身係機迷,應該就超級極度無限希望聽日有假放。仲問點解?《戰地風雲1》同《文明帝國 VI》都同樣喺星期五正式推出喎!有假放仲唔仆番/留喺屋企狂煲3日咩!!!??簡直係千載難逢嘅機會!

3.大覺瞓

周末本身就最想瞓番覺好,如果咁啱今次係清晨開始掛8號,仲唔爭取機會瞓到自然醒咩!補眠當然係最重要架啦!

4.唱K

另一個打風同朋友必做嘅,當然就係出去唱K啦!閂埋K房門大聲吶喊,出面發生乜野事都唔知,而且仲唔使用唱K神器獨自高歌咁悶添!

5.煲劇

劇集多到睇唔完,無端端多左時間出嚟仲唔chur到盡咩?!一app旁身就算等車塞車都可以開始睇,但最重要當然係記得帶番個尿袋有備無患啦!

6.打牌

香港打風者,四方城都不知幾太平!難得齊腳仲唔約埋親朋戚友落場競技咩?!

7.開P

出去玩好似有啲危險,住得僻啲又會擔心番唔到屋企。咁嘅話不如就去其中一個朋友度開P玩下,都基本有個安全地方可以留耐少少,甚至借宿一宵。

8. 大食會

打風出去玩可能仲多人過平時,不如就趁機同朋友收工買下野食,去其中一個度開大食會打邊爐啦?咁就唔怕同人爭位喇!
同大家介紹左咁多個打風活動之後,大家係唔係好有憧憬呢?但FF咁多都係無用架...…一切都要留待聽日先會揭曉...…