事情雖已過了一段很長的時間,但發生的年份還是清楚記得,那當然免得過也不想刻意說出來。
 
以過來人身份給你一個忠告,做人千祈唔好咁八卦。
 
話說立場新聞久不久就會舉辦一次博客聚會,而每次聚會的 setting 都必定齊全。Setting齊全的意思,就是跟梁朝偉在某部電影所說一樣,有 cake 又有糖,有女亦有房。是的,不騙你,雜物房都係房,所以真係有女亦有房。女士去到也會樂而忘返,縱然冇獎抽,但肯定有仔溝。
 
Sorry,寫得俗咗。
 
嗰晚去到立場新聞位於觀塘的辦公室,站在門外已聽見裏面人聲鼎沸。最最最鍾意熱鬧,尤其是有酒喝的地方,我第一時間走入洗手間。
 
進入任何一個聚會前的五分鐘之內,必定要騰出時間 for a final check on yourself。一係唔入去,一入去就要巔峰狀態。濕少少水㩒一㩒側邊頭髮,再用無名指順掃眉毛;側身四十五度確保西裝畢挺,正面看清楚 spread collar 中間那個溫莎結打得溫莎到不能再溫莎。
 
就連我自己都好有衝動嘴一嘴塊鏡。
 
入到去,見到咁多人,自然啟動孔雀開萍模式。
 
好快,I am talking about 一分鐘之內,已經有位女士(目及)我。

 
(目及)完一眼,再一眼。既然佢咁主動,我冇理由唔展示少少風度。
 
我隨即攞起一隻立場新聞提供嘅膠杯,斟咗一杯立場新聞提供嘅膠酒。沒所謂的,呢啲場合,酒是用來給每個人壯膽的,酒膠是必然的。
 
「Hi,我哋係咪見過?」對住咁主動嘅女士,開場白老土少少都唔緊要。
 
佢嘅回答出乎意料。
 
「你冇見過我,不過我見過你。」
 
衰鬼,原來已經唔係第一次(目及)我。
 
「你見過我?喺邊度?」我漫不經心的問,嘴角不禁漾起一絲「世界在我腳下」的笑容。
 
佢再一次畀咗一個出呼意料嘅答案。
 
「你知唔知自己上咗榜?」她的唇邊泛起一抹淫笑。
 
我開頭以為佢講緊立場新聞嘅博客榜,但諗諗吓佢又冇理由知道我係邊個。
 
「咩榜?」
 
她抿嘴而笑,拿出手機,按幾下之後才給我看看那個螢光幕。
 
細看之下,原來我竟是全香港 Most Viewed Linkedin Profiles 的第二位,即是我嘅 Linkedin profile 喺全香港係第二多人睇。
 
嗰刻我覺得自己型到世界盡頭,因為我以為自己張 profile picture 真係靚仔到咁嘅地步,而我嘅傾慕者可能已經不知不覺由金融街排到去威靈頓街。
 
嚟到今時今日,我當然知道係乜嘢一回事。
 
今早在某條天橋上撞到一位舊同事。
 
「喂 Marcus,畀啲嘢你睇。」
 
原來佢喺本年度嘅 Linkedin Most Viewed Profiles 都有排名。
 
「勁唔勁呢?」他問。
 
看他滿臉自信,實在不忍心當場打擊他,就正如當年那個沒有在博客聚會當場打擊我的女士一樣。
 
其實用 Linkedin 嘅人一定知,當你睇完人哋嘅 profile 之後,人哋一定會知道你睇過,亦即係話,你睇完一百個人嘅 profile,嗰一百個人,係會好自然地睇吓究竟係邊條契弟無啦啦咁得閒走去(目及)佢哋個 profile。
 
換句話說,你越八卦,你個 profile 就會越多人睇。
 
想當年,原來我就是 Linkedin 八公排行榜的第二把膠椅。


 第二把膠椅

 https://www.facebook.com/marcusyiphk